თავისუფალი უნივერსიტეტის აგ­რა­რუ­ლი მე­ქა­ნი­კის ინ­ჟი­ნე­რი­ის ფაკულტეტის IV კურ­სის სტუდენტი საბა ებანოიძე 2024 წლის აგვისტოდან დეკემბრის ჩათვლით აშშ მისურის შტატის უნივერსიტეტში სასწავლო ვიზიტით იმყოფებოდა და მექანიკის ინჟინერიის ფაკულტეტზე სწავლობდა.

ამის შესაძლებლობა საბამ აშშ-ს სახელმწიფო დეპარტამენტის გლობალური გაცვლითი პროგრამის (Global UGRAD) კონკურსში გაიმარჯვებით მოიპოვა. ამ პროგრამაში, ყოველწლიურად, მთელი მსოფლიოდან 300 უცხოელი სტუდენტი ერთვება.

„მისურის უნივერსიტეტში, ინჟინერიის სპეციალური საგნების გარდა, უნდა ამერჩია საგანი, რომელიც ამერიკის კულტურასთან იქნებოდა დაკავშირებული, – გვიამბობს საბა ებანოიძე, – ამერიკის კულტურის შესწავლა გადავწყვიტე. სიღრმისეულად გავეცანი ამერიკის ისტორიის, ეკონომიკის, კულტურის, განათლების ასპექტებს, მჭიდრო ურთიერთობა მქონდა ამერიკელ სტუდენტებთან.

ერთი სემესტრის განმავლობაში ამერიკულ უნივერსიტეტში სწავლა ჩემთვის ძალიან დიდი გამოცდილებაა – გავიღრმავე ცოდნა საინჟინრო მიმართულებით, გავიუმჯობესე ინგლისურ ენაში ცოდნა და ამერიკის შესახებ ბევრი რამ შევიტყვე.

გაცვლითი პროგრამა ასევე ითვალისწინებს საზოგადოებრივი სამუშაოს შესრულებას. სამეცნიერო მუზეუმში მოხალისედ მუშაობა ავირჩიე. სკოლის მოსწავლეებთან ვატარებდი საუბრებს ისეთ სამუზეუმო საკითხებზე, როგორიცაა ექსპონატების მომზადება, მიკროსკოპთან მუშაობა და სხვ.

ამერიკულ უნივერსიტეტებს, საქართველოში მოქმედი უნივერსიტეტებისგან განსხვავებით, აქვთ მრავალფეროვანი მატერიალურ-ტექნიკური ბაზა, რომ თეორიული ცოდნა პრაქტიკულად გამოიყენო. ორ საგანში ლაბორატორიული კვლევების, ექსპერიმენტების ჩატარებისა და პრაქტიკული მუშაობის შესაძლებლობა მომეცა.

ამერიკაში ცხოვრების ხუთი თვე ჩემთვის საკუთარ თავზე მუშაობისა და პიროვნული განვითარებისთვის ძალიან მნიშვნელოვანი იყო. გამიძლიერდა მოტივაცია, რომ დასახული მიზნის მისაღწევად მეტი ვიშრომო“.

გლობალური გაცვლითი პროგრამის მონაწილე სტუდენტებს უნივერსიტეტში საკუთარი ქვეყნის შესახებ პრეზენტაცია უნდა წარედგინათ. საბა იხსენებს, რომ „იქაური სტუდენტები, პირველ რიგში, საქართველოს მდებარეობით ინტერესდებოდნენ. შემდეგ იწყებოდა მსჯელობა, საქართველო ევროპის ნაწილია თუ აზიის.

უცხოელებს ძალიან მოსწონთ და აინტერესებთ საქართველოს ბუნება, ისტორია; ჩვენი უნიკალური კულტურა, რომელიც მათი შეფასებით, არც ევროპულია და არც აზიური. ამერიკიდან გამომგზავრებისას უცხოელი სტუდენტების უმრავლესობა დაინტერესდა და არკვევდა, საქართველოში ჩამოსასვლელად ვიზა დასჭირდებათ თუ არა.

ამერიკელები უფრო ინდივიდუალური კულტურის ხალხია. 18-20 წლის ახალგაზრდებს ძალიან კარგად აქვთ გათვითცნობიერებული, რისი მიღწევა სურთ და რომ მომავლის შექმნა მხოლოდ მათზეა დამოკიდებული.

მისურის უნივერსიტეტში სწავლა საკმაოდ ძვირია – ერთი სემესტრის ღირებულება 10 ათასი დოლარი ღირს. ამერიკელ სტუდენტებს აქვთ საკმაოდ შეღავათიანი, ფაქტობრივად, ნულოვანი პროცენტით სესხის აღების შესაძლებობა. ყველა მოტივირებულია, რომ კარგად ისწავლოს.

მისურის უნივერსიტეტში უცხოელ სტუდენტებს სტიპენდიას გვიხდიდნენ. ამიტომ მომეცა შესაძლებლობა, ამერიკის სხვადასხვა ქალაქში მემოგზაურა. ამ გაცვლითი პროგრამის მონაწილე 8 ქართველ სტუდენტთან ერთად, ვიმყოფებოდი სან-ფრანცისკოში, ნიუ-იორკში, ჩიკაგოში, ბოსტონსა და ვაშინგტონში. ამ მოგზაურობამ ჩემი ამერიკული ცხოვრება კიდევ უფრო მრავალფეროვანი გახადა“.

საბა ებანოიძე მაგისტრატურაში სწავლის გაგრძელებას ევროპულ ან ამერიკულ უნივერსიტეტში გეგმავს. ინჟინერიაში რომელ სფეროს აირჩევს, ჯერ არ გადაუწყვეტია. თავისუფალ უნივერსიტეტში სწავლის განახლების შემდეგ აპირებს, რომ ამერიკაში მიღებული ცოდნა და გამოცდილება კურსელებსა და ლექტორებს გაუზიაროს.

ნინო კაპანაძე

ამავე თემაზე დაგაინტერესებთ

საბა ებანოიძე გაცვლითი პროგრამის ფარგლებში ამერიკაში ისწავლის