ხარაგაულის მუნიციპალიტეტში 23 თებერვლიდან გადაუღებლად თოვს.

რა მდგომარეობაა ამჟამად ხარაგაულის სოფლებში, გაწმენდილია თუ არა თოვლისგან ცენტრალური საავტომობილო გზები, – ამ შეკითხვებით ხარაგაულის მუნიციპალიტეტის მერის პირველ მოადგილეს, ვარლამ ჭიპაშვილს მივმართეთ.

მისგან მოპოვებული ინფორმაციით, მუნიციპალიტეტიდან ძირულისა და კიცხის მიმართულებით ცენტრალური საავტომობილო გზები გაწმენდილია. ამ წუთებში კიცხისკენ მომავალი გზა ზესტაფონიდანაც იწმინდება.

„ხარაგაულის მუნიციპალურ სამსახურს – „დასუფთავებისა და კეთილმოწყობის გაერთიანებას“, ბალანსზე ხუთი ტრაქტორი და ერთი გრეიდერი ჰყავს, – ამბობს ვარლამ ჭიპაშვილი, – მუნიციპალიტეტს დაქირავებული ჰყავს კომპანია (დირექტორი ნიკა ოსანაძე), რომელიც ვალდებულია, რომ სოფლებში გზები თოვლისგან გაწმინდოს.

ცენტრალური საავტომობილო გზები გაწმენდილია ხევში, ბორითში, კიცხში, საღანძილეში. ტრაქტორები მუშაობას იწყებენ ვახანის, ხუნევის, ხიდარის, სარგვეშის, იგორეთის, წყალაფორეთის, ფარცხნალისა და ქროლის გზების გასაწმენდად. ამჟამად კონტრაქტორი კომპანიისგან დაქირავებულია 15 ტრაქტორი.

ხარაგაულში ავტოსადგურის მიმდებარე ტერიტორიაზე მუშაობს იაპონიის საელჩოსგან გრანტით შეძენილი ტრაქტორი.

ძალიან რთული მდგომარეობაა ხარაგაულის მუნიციპალიტეტის სოფლებში. „დასუფთავებისა და კეთილმოწყობის გაერთიანების“ თანამშრომლები ახლა მობილიზებულები არიან იმისთვის, რომ დაბა ხარაგაულსა და სოფლებში მარტოხელა მოხუცებსა და განსაკუთრებული საჭიროების მქონე პირებს მიეხმარონ, – ჩვენი პრიორიტეტი ახლა სახლის სახურავების თოვლისგან გაწმენდაა. ამიტომ დაბა ხარაგაულში ტროტუარები ამ გაერთიანების თანამშრომლებმა ვეღარ გაწმინდეს.

ხარაგაულის მუნიციპალიტეტის რთული რელიეფის გამო, ბორბლებიან ტრაქტორებს გზების თოვლისგან გაწმენდა უჭირთ. ამიტომ მუხლუხებიან ტრაქტორებს ვამუშავებთ. მაქსიმალურად ვცდილობთ, რომ მოსახლეობას დავეხმაროთ“, – ამბობს ხარაგაულის მერის პირველი მოადგილე.

პოსტი სოციალურ ქსელში

დიდთოვლობასთან დაკავშირებული პოსტი სოციალურ ქსელში