სოფლის განვითარების სააგენტო თხილის წარმოების ხელშეწყობის პროგრამას 2022 წლიდან ახორციელებს. ამ პროგრამის ფარგლებში, დაფინანსება გაიცემა თხილის მოვლა-მოყვანისთვის საჭირო პესტიციდებისა და აგროქიმიკატების შესაძენად.

დაფინანსების მისაღებად აუცილებელი პირობაა, რომ ფერმერი საკუთრებაში ან/და სარგებლობაში, ან/და ფაქტობრივ მფლობელობაში ჯამურად ფლობდეს არანაკლებ 0.2 ჰა-დან არაუმეტეს 3 ჰა თხილის ბაღს.

დაფინანსების მოცულობა 500 ქულით განისაზღვრება 1 ჰა თხილის ბაღზე გადაანგარიშებით. 1 ქულა = 1 ლარს. ქულები პროგრამაში ჩართულ პირს აგრობარათზე დაერიცხება. ბარათზე დარიცხული ქულების გამოყენების ბოლო ვადაა 2025 წლის 31 აგვისტო.

პროგრამაში ჩართვის მსურველებმა უნდა მიაკითხონ სოფლის განვითარების სააგენტოს საინფორმაციო-საკონსულტაციო ცენტრს ხარაგაულში, ადმინისტრაციული შენობის მესამე სართულზე. თან უნდა იქონინონ პირადობის მოწმობა და მიწის ნაკვეთის საკუთრების/სარგებლობის დამადასტურებელი დოკუმენტი, ან წარადგინონ მიწის ნაკვეთის საკადასტრო კოდი.

საინფორმაციო-საკონსულტაციო ცენტრის წარმომადგენელი ბონდო კიკნაველიძე ამბობს, რომ მოსახლეობის ინფორმირების მიზნით შეხვედრები 4-7 თებერვალს მათ სამსახურში, ვარძიაში, კიცხსა და წყალაფორეთში ჩატარდა.

„გასულ წელს ამ პროგრამაში ხარაგაულიდან 170 ფერმერი ჩაერთო, – ამბობს ბონდო კიკნაველიძე, – ისინი კმაყოფილები არიან, რადგან გაიზარდა თხილის მოსავალი და ნაყოფის ხარისხი გაუმჯობესდა.

მერის წარმომადგენლებმა მოსახლეობას ინფორმაცია მიაწოდეს და თუ ვინმე შეხვედრებზე ვერ მოვიდა, 10-15 ფერმერის შეკრების შემთხვევაში, საინფორმაციო-საკონსულტაციო ცენტრში შეხვედრას კიდევ გავმართავთ.

ფერმერს თხილის ბაღის ნაკვეთი თუ არ აქვს დარეგისტრირებული, საველე ამზომველები უფასოდ დაურეგისტრირებენ. მზად ვართ, პროგრამაში ჩართვის ყველა მსურველს დავეხმაროთ. მთავარია, ჩვენამდე მოვიდნენ“, – ამბობს ბონდო კიკნაველიძე.

საინფორმაციო-საკონსულტაციო ცენტრის წარმომადგენელი ბონდო კიკნაველიძეს შეგიძლიათ დაუკავშირდეთ ტელეფონით, ნომერზე – 595 05 48 08.