ხარაგაულში პროექტის – „მაღალმთიან რეგიონში მცხოვრები ამომრჩევლების ინფორმირებულობა ელექტრონულ არჩვენებზე“ ფარგლებში ამომრჩევლებთან შეხვედრა გაიმართა.

დაინტერესებულ ამომრჩევლებს ტრენერი მარიკა ვაჭარაძე ზრდასრულთა განათლების ცენტრსა და „ჩემი ხარაგაულის“ რედაქციაში შეხვდა.

ამომრჩევლებმა ინფორმაცია მიიღეს ისეთ საკითხებზე, როგორიცაა – საუბნო საარჩევნო კომისიის წევრების, დამკვირვებლებისა და წარმომადგენლების უფლება-მოვალეობები წინასაარჩევნო პერიოდში და არჩევნების დღეს, ამომრჩეველთა სიის ფორმირების წესი და ვადები.

განსაკუთრებული ყურადღება გამახვილდა ხმის ელექტრონულად მიცემის საკითხზე. #48 ხარაგაულის საარჩევნო ოლქში ელექტრონულად ხმის მიცემა 18 საარჩევნო უბანზე მოხდება, დანარჩენ საარჩევნო უბნებზე – ძველი წესით.

ელექტრონულად ხმის მიცემის პროცედურა ასეთია:

  • საარჩევნო უბანზე გამოცხადების შემდეგ გაიარე მარკირების შემოწმება;
  • მიდი ნებისმიერ თავისუფალ სარეგისტრაციო მაგიდასთან;
  • რეგისტრატორს წარუდგინე შენი პირადობის მოწმობა (ID ბარათი) ან პასპორტი;
  • ვინაობის დადასტურების შემდეგ მიიღე ქვითარი და მოაწერე ხელი;
  • ქვითარი ანაცვლებს სამაგიდო სიაზე ხელმოწერის პროცედურას. ქვითრით შეუძლებელია შენი არჩევანის დადგენა;
  • გაიარე მარკირების პროცედურა და მიიღე ბიულეტენი;
  • საარჩევნო კაბინაში გააფერადე შენთვის სასურველი, მხოლოდ ერთი, პარტიის წინ არსებული წრე;
  • ბიულეტენი მოათავსე სპეციალურ ჩარჩო-კონვერტში ისე, რომ არ ჩანდეს არჩევანი. შემდეგ შეაცურე ხმის მთვლელ აპარატში;
  • ხმის მთვლელი აპარატი ანაცვლებს საარჩევნო ყუთს. აპარატი მხოლოდ ითვლის არჩევნების შედეგებს და შეუძლებელია იმის დადგენა, რომელია შენი ბიულეტენი;
  • არ დატოვო უბანი აპარატის მიერ ბიულეტენის მიღების დადასტურებამდე.

გახსოვდეთ, რომ თქვენი საარჩევნო ხმის ფარულობა დაცულია. ბიულეტენის ხმის მთვლელ აპარატში მოთავსების შემდეგ, შეუძლებელია იმის დადგენა, თუ ვის ეკუთვნის იქ მოთავსებული ბიულეტენი. ვერიფიკაციისა და ხმის მთვლელი ელექტრონული აპარატები არ არის დაკავშირებული ინტერნეტთან.

მარიკა ვაჭარაძემ უპასუხა შეხვედრაზე მყოფთი ამომრჩევლების შეკითხვებს.

პროექტს „მაღალმთიან რეგიონში მცხოვრები ამომრჩევლების ინფორმირებულობა ელექტრონულ არჩვენებზე“ ახორცილებს ჟურნალისტთა ქსელი გენდერული თანასწორობისთვის, რომლის ფინანსური მხარდამჭერია IFIS.

პროექტის ფარგლებში დაგეგმილი შეხვედრები კამპანია „ჩემი არჩევანის“ ფარგლებში ტარდება.