3 ივლისს ერთიანი ეროვნული გამოცდები იწყება. ხარაგაულის მუნიციპალიტეტის ხიდრის საჯარო სკოლის კურსდამთავრებული მარიამ ჩაჩანიძე აბიტურიენტებს რჩევებს უზიარებს.

პოსტი აბიტურიენტებისთვის:

3 ივლისს ერთიანი ეროვნული გამოცდები იწყება. ბუნებრივია, ვღელავთ. ამაში გასაკვირი არც არაფერია! არ ვიცი რამდენად ენდობა ვინმე ჩემს კომპეტენციას, მაგრამ, წინა წლის გამოცდილებით, შემიძლია მოგცეთ რამდენიმე რჩევა:

  1. არ ინერვიულოთ! ნერვიულობით საკუთარ თავს უქმნით ხელოვნურ დაბრკოლებებსა და საფრთხეს.
  2. გამოცდის წინა დღეს აუცილებლად დაისვენეთ, არ იმეცადინოთ. გაისეირნეთ სუფთა ჰაერზე, გაერთეთ მეგობრებთან ერთად და არ იფიქროთ გამოცდაზე.
  3. დაიმახსოვრეთ, არავის წინაშე არ ვართ ვალდებულნი მაღალი ქულა ავიღოთ.
  4. ენდეთ საკუთარ თავს და არ შეიტანოთ ეჭვი თქვენს შესაძლებლობებში.

აქვე, ერთი პატარა განცხადება:

წელს თავადაც აბიტურიენტი გახლავართ. ვიცი, ბევრი მხარდამჭერი მყავს. თუმცა გთხოვთ, არ მომწეროთ არც კარგი და არც ცუდი, მომეცით დრო, ნუ გამიზიარებთ თქვენს მოლოდინებს ჩემს წარმატებასთან დაკავშირებით. ახლა ეს ერთგვარი სტრესია!

ასევე, მინდა წინასწარ აღვნიშნო, რომ ჩემი შედეგები არ გასაჯაროვდება, არანაირი გზით. იმიტომ, რომ მე ასე მსურს! უმაღლესი ქულების აღების შემთხვევაშიც კი, ვუკრძალავ ყველას ინფორმაციის გასაჯაროებას.

პ.ს. გამოცდასა თუ ქულასთან დაკავშირებულ არცერთ შეკითხვაზე არ ვუპასუხებ არავის! თუ მართლა გინდათ ვიყო წარმატებული, შეისმინეთ ჩემი თხოვნა!

წარმატებები ყველა აბიტურიენტს!

წერს მარიამ ჩაჩანიძე სოციალურ ქსელში.