პაპილომავირუსის საწინააღმდეგო ვაქცინაციის ჩატარებას, სახელმწიფო პროგრამის ფარგლებში 27-დან 45 წლამდე ასაკის ქალებიც შეძლებენ. მთავრობის 2023 წლის 19 სექტემბრის #363 დადგენილებით, ჯანმრთელობის დაცვის სახელმწიფო პროგრამების იმუნიზაციის დანართში ცვლილება შევიდა. კერძოდ:

  • 15 წლამდე გოგონებში პაპილომა ვირუსის აცრა უნდა ჩატარდეს ორჯერადად, 6 თვის ინტერვალით;
  • 15-45 წლის ქალთა ასაკობრივ ჯგუფში (27-45 წლის ასაკობრივ ჯგუფში ექიმის რეკომენდაციით) სამჯერადად შემდეგი სქემით 0 – 2 – 6 თვე. პირველ და მეორე დოზებს შორის ინტერვალი უნდა იყოს არანაკლებ ერთი თვე, ხოლო მეორე და მესამე დოზებს შორის არანაკლებ 3 თვე.

აცრების ეროვნულ კალენდარს 10-12 წლის ბიჭების პაპილომა ვირუსზე ვაქცინაცია დაემატება.

  • 15 წლამდე ბიჭებში პაპილომა ვირუსის აცრა უნდა ჩატარდეს ორჯერადად, 6 თვის ინტერვალით;
  • 15-26 წლის ვაჟთა ასაკობრივ ჯგუფში სამჯერადად შემდეგი სქემით 0 – 2 – 6 თვე. პირველ და მეორე დოზებს შორის ინტერვალი უნდა იყოს არანაკლებ ერთი თვე, ხოლო მეორე და მესამე დოზებს შორის არანაკლებ 3 თვე.

ამ ბრძანებით განსაზღვრული ყველა ასაკობრივი კატეგორიისთვის პაპილომა ვირუსზე აცრა უფასოა.

ადამიანის პაპილომა ვირუსი იწვევს კანისა და ლორწოვანი გზების ინფიცირებას. ის წარმოადგენს რეპროდუქციული სისტემის ყველაზე გავრცელებულ ინფექციას და არის მრავალი დაავადების გამომწვევი მიზეზი როგორც მამაკაცებში, ისე ქალებში.

პაპილომა ვირუსი ერთ-ერთი წამყვანი მიზეზია ქალებში უშვილობის და საშვილოსნოს ყელის სიმსივნის განვითარების. ამისგან თავდაცვის ყველაზე ეფექტური გზა კი სწორედ პაპილომა ვირუსის საწინააღმდეგო ვაქცინაციაა.