ხარაგაულის მუნიციპალიტეტში მოქმედ სკოლებში ინფრასტრუქტურული პრობლემების მოსაგვარებლად ცენტრალური ბიუჯეტიდან 170 ათასი ლარია  განსაზღვრული. ამ თანხით სკოლებში მცირე ინფრასტრუქტურული პრობლემების მოგვარება იგეგმება.

მოლითისა და სარგვეშის საჯარო სკოლებში ამ მიზნით გამოცხადებულ ტენდერებში გამარჯვებულ კომპანიებთან ხელშეკრულებები უკვე გაფორმდა.

  • მოლითის საჯარო სკოლაში სპორტული მოედნის დაზიანებულ საყრდენ კედელს შპს „აისი“ 26 721 ლარად მოაწყობს;
  • სარგვეშის საჯარო სკოლის შენობაში კარ-ფანჯრებს ი/მ „თორნიკე ბარბაქაძე“ 122 312 ლარად შეცვლის.

ამ ორ სკოლაში სამუშაოები, ხელშეკრულებების თანახმად, 28 აგვისტოსთვის უნდა დასრულდეს.

ხარაგაულის საგანმანათლებლო რესურსცენტრის უფროსი მარინე ვეფხვაძე ამბობს: „ცენტრალური ბიუჯეტიდან განსაზღვრული თანხით ხარაგაულის #3 საჯარო სკოლის სამასწავლებლოსა და დირექტორის კაბინეტის იატაკის შეცვლაც იგეგმება.

წლის განმავლობაში სკოლის დირექტორებთან და განათლების სამინისტროს ინფრასტრუქტურის სააგენტოსთან ვმუშაობდით. 2023 წელს ამ სააგენტოსგან მოვითხოვეთ – ხიდარის, ვარძიის, ვაშლევის, გედსამანიისა და ხარაგაულის #2 საჯარო სკოლების სრული რეაბილიტაცია.

სხვადასხვა ფონდების დაფინანსებით, წელსვე ველოდებით ბორის, ვახანის, ხუნევისა და ბორითის საჯარო სკოლების შენობების სრული რეაბილიტაციის დაწყებას.

განათლების სამინისტროს ინფრასტრუქტურის სააგენტო დღე-დღეზე წყალაფორეთის სკოლის ახალი შენობის ასაშენებლად ტენდერს გამოაცხადებს.

2023 და 2024 წლებში ხარაგაულის მუნიციპალიტეტში მოქმედი ყველა სკოლის სრული რეაბილიტაცია უნდა ჩატარდეს, რადგან ყველა სკოლამ აუცილებლად უნდა გაიაროს ავტორიზაცია. ამისათვის კი მათი ინფრასტრუქტურა გამართული უნდა იყოს“, – ამბობს მარინე ვეფხვაძე.

ფოტოზე: სარგვეშის საჯარო სკოლა