რეზო თაბუკაშვილის სახელობის სახალხო ლიტერატურულმა თეატრმა (დირექტორი იზა ვეფხვაძე) ხარაგაულის მუნიციპალიტეტის გამგებელს 10 ივნისს მიმართა 9 ათასი ლარის მოთხოვნით.

„მოგახსენებთ, რომ რეზო თაბუკაშვილის სახელობის სახალხო ლიტერატურულ თეატრს სახელფასო ფონდში ესაჭიროება 3 500 ლარი, – აღნიშნულია მოხსენებით ბარათში, – თეატრის მოახლოებული 20 წლის იუბილესთან დაკავშირებით, რომელიც უნდა გაიმართოს ივნისის ბოლოს, ღონისძიების დასაფინანსებლად დამატებით გვესაჭიროება: სარეკლამო ხარჯი 1 000 ლარი (ბანერები, აფიშები, მოსაწვევები, პროგრამები, საიუბილეო გაზეთი, სცენის მოწყობა, დეკორაციები), ტრანსპორტირებისა და ღამისთევის ხარჯი 1 000 ლარი, სტუმრების გამასპინძლების ხარჯი (ფურშეტი, სადილი) – 3 000 ლარი, საიუბილეო თარიღთან დაკავშირებული სიმღერის ჩაწერის ხარჯი – 500 ლარი; სულ – 9 000 ლარი.“

გამგეობის საფინანსო-საბიუჯეტო სამსახურმა ლიტერატურულ თეატრს 5 ათასი ლარი გამოუყო 20 წლის იუბილეს აღსანიშნავი ღონისძიების ხარჯებისთვის.

ხარაგაულის მუნიციპალიტეტის საკრებულომ 17 ივნისს რიგგარეშე სხდომაზე მხარი დაუჭირა ლიტერატურული თეატრისთვის ადგილობრივი ბიუჯეტიდან დამატებით 5 ათასი ლარის გამოყოფას.