საზოგადოებრივმა ორგანიზაცია „ჰელფინგ ჰენდმა“ და გაეროს ბავშვთა ფონდმა წლის საუკეთესო მოხალისეები გამოავლინეს. მათ შორისაა ხარაგაულის მუნიციპალიტეტის სოფელ ვაშლევის სკოლის მოსწავლე შოთი წიქარიშვილი.

პროექტი – „საქართველოს მოხალისე“ ახალგაზრდების მიერ საზოგადოებისათვის სასარგებლო საქმეების მოხალისეობრივად გაკეთებას ისახავს მიზნად. შოთი წიქარიშვილმა გასული წლის განმავლობაში ვაშლევის სკოლაში განახორციელა პროექტი ჰიგიენის დაცვისა და სკოლის მუდმივი წყალმომარაგების აუცილებლობაზე.

„ჰელფინ ჰენდის“ დახმარებით შოთი თანატოლებთან ერთად ჰერეთის სკოლაში ქართველ მოსწავლეებს წიგნებით ამარაგებს. ის უმცროსკლასელებს ინგლისური ენის შესწავლაში დამატებით ამეცადინებს.

ხარაგაულიდან მოხალისეთა პროექტში წარმატებული მონაწილეობისათვის სიგელებით დაჯილდოვდნენ:

  • ნია ყიფიანი (მარელისის საჯარო სკოლა);
  • ნათია გოგოლაძე (ვერტყვიჭალის სკოლა);
  • ლიზი კურტანიძე (ხარაგაულის #3 სკოლა);
  • საბა კაკულია (ხარაგაულის #2 სკოლა);
  • მარიამ ბერაძე (ბორის სკოლა);
  • ნიკა ბერაძე (კიცხის სკოლა).

მოხალისე ახალგაზრდების მხარდაჭერისათვის მადლობის სიგელი გადაეცა ხარაგაულის მუნიციპალიტეტის მერიას.

„ახალგაზრდების საზოგადოებრივ ცხოვრებაში ჩართვა ძალიან მნიშვნელოვანია მათი და საზოგადოების განვითარებისათვის“, – აღნიშნა დაჯილდოების ღონისძიებაზე ღასან ხალილმა, – გაეროს ბავშვთა ფონდის წარმომადგენელმა საქართველოში, – ისეთი კრიზისის დროს, როგორიც COVID 19-ის პანდემიაა, საჭიროა მოზარდებისა და ახალგაზრდების პრიორიტეტებისა და საჭიროებების გათვალისწინება. აუცილებელია მათი კარგად ინფორმირება და შესაბამისი რესურსებითა და განათლებით აღჭურვა“.

„ჰელფინგ ჰენდის“ ხელმძღვანელი თინათინ მესხი ამბობს, რომ წლიდან წლამდე პროექტში ჩართული მოხალისე ახალგაზრდები სოციალური, განათლების, ჯანდაცვის მიმართულებით სხვადასხვა აქტივობებს ახორციელებენ. საუკეთესო მოხალისეების გამოვლენისას კი შესრულებული საქმიანობის მოცულობასა და ხარისხს ითვალისწინებენ.

წლის საუკეთესო მოხალისეთა დაჯილდოება მესამე წელია ტარდება.

ფოტოზე: მარცხნიდან – ხარაგაულელი მოხალისეები – საბა კაკულია, შოთი წიქარიშვილი, ნიკა ბერაძე და „ჰელფინგ ჰენდის“ ხელმძღვანელი თინათინ მესხი