საბავშვო ბაღების ავტორიზაციისთვის აღმზრდელთა სერტიფიცირება ერთ-ერთი მნიშვნელოვანი საკითხია.

აღმზრდელებმა 2024 წლიდან პედაგოგის სტატუსი უნდა მიიღონ. ამ მიზნით მთელი ქვეყნის მასშტაბით, მათ შორის, ხარაგაულშიც, მათთვის ტრენინგები ტარდება.

ხარაგაულის სკოლამდელ დაწესებულებათა გაერთიანების 24-მა აღმზრდელმა აღმზრდელ-პედაგოგთა პროფესიული განვითარების 66 საათიანი ტრენინგ-კურსი და ტესტირება გაიარა. ამ ტესტირების პასუხები, სავარაუდოდ, ერთ თვეში გახდება ცნობილი. აღმზრდელებმა ტრენინგებზე მიღებული 4-4 პრაქტიკული დავალება ორ კვირაში უნდა შეასრულონ, რაც, ტესტის პასუხებთან ერთად, მათი სერტიფიცირებისთვის აუცილებელია.

„დანარჩენი 24 აღმზრდელი ტრენინგ კურსს 2023 წლის ივნისში გაივლის, – ამბობს სკოლამდელ დაწესებულებათა გაერთიანების დირექტორის მოვალეობის შემსრულებელი თამარ ლაცაბიძე, – აღმზრდელები ტრენინგებზე მიღებული ცოდნით კმაყოფილები არიან და სასწავლო-სააღმზრდელო პროცესში ბევრი რამის შეცვლას აპირებენ.

ხარაგაულის #1 საბავშვო ბაღის აღმზრდელი ია თაბუკაშვილი ამბობს, რომ ახალი მეთოდოლოგიით სწავლება მაქსიმალურად ბავშვის საჭიროებებსა და სურვილებს უნდა მოარგოს.

„სიახლეები, პირველ რიგში, მშობლებს უნდა გავაცნოთ, – ამბობს ია თაბუკაშვილი, -საბავშვო ბაღებში, ფაქტობრივად, ზეიმები აღარ ჩატარდება. ეს მისასალმებელია. წარმოიდგინეთ, 25 ბავშვი თითო სამსტროფიან ლექსს მაინც იზეპირებდა. ამავე დროს ვასწავლიდით სიმღერებს, ცეკვებს. ზეიმისთვის მზადების პროცესშიც და ზეიმზეც ბავშვები ძალიან იღლებიან.

სამი თვე შემოდგომის ზეიმის სამზადისში ვართ, შემდეგ საახალწლო და საგაზაფხულო კონცერტებისთვის ვემზადებით. ძირითადი, განმავითარებელი აქტივობებისთვის დრო აღარ გვრჩება. მომავალში ყველაფერი ისე უნდა დავგეგმოთ, როგორც ბავშვს ენდომება. თუ მისთვის ლექსის ან სიმღერის დასწავლა მიუღებელია, ვერ დავაძალებთ.

საბავშვო ბაღებში ოთახები თანამედროვე გამოწვევებს მეტ-ნაკლებად პასუხობს – ყველაფერი ბავშვის სიმაღლეზე, მისთვის ხელმისაწვდომადაა მოწყობილი.

ყველაზე მნიშვნელოვანი სიახლე, რაც პრაქტიკაში უნდა დავნერგოთ ისაა, რომ თითოეული აქტივობა ბავშვებთან შეთანხმებით უნდა დავგეგმოთ. აქამდე აღმზრდელები ვადგენდით დღის განრიგს. ახლა ამ პროცესში ბავშვები და მათი მშობლები უნდა ჩავრთოთ“.

ხარაგაულის სკოლამდელ დაწესებულებათა გაერთიანების სასწავლო პროგრამების კოორდინატორი თამარ ავალიშვილი ამბობს, რომ ძირითადი ცვლილება სასწავლო-სააღზრდელო პროცესში შედის.

„მთავარი მიზანია, რომ ბაღი ბავშვისთვისაა და არა ბავშვი ბაღისთვის, – ამბობს თამარ ავალიშვილი, – დარწმუნებული ვარ, დატრენინგებული აღმზრდელები დავალებას თავს კარგად გაართმევენ 2024 წლისთვის გაერთიანებაში დასაქმებული ყველა აღზრდელი პედაგოგის სტატუსს მოიპოვებს“.

სკოლამდელ დაწესებულებათა გაერთიანების აღმზრდელები ქუთაისის აკ. წერეთლის სახელმწიფო უნივერსიტეტის ტრენერთა გუნდმა გადაამზადა. ტრენინგების ჩასატარებლად ამ გაერთიანების ბიუჯეტიდან 4 990 ლარი დაიხარჯა.

ნინო კაპანაძე

თქვენ ასევე დაგაინტერესებთ

„მეტი დაფინანსების პირობებში, ბაღებისთვის ბევრ სათამაშოს შევიძენდით“

„მეტი ფული უნდა დაიხარჯოს მასწავლებელთა მომზადებაზე, ვიდრე მათ შემოწმებაზე“