ჯანდაცვის მინისტრის მოადგილის, თამარ გაბუნიას განცხადებით, თამბაქო პირველი იანვრიდან ახალი შეფუთვით გაიყიდება.

ცვლილების თანახმად, ყველა ტიპის კოლოფი იქნება ერთფეროვანი და აკრძალული იქნება ბრენდის, ლოგოს, სასაქონლო ნიშნის ან მისი აღმნიშვნელი სხვა ელემენტის გამოყენება.

„მთავრობის დადგენილება აზუსტებს ტექნიკურ მოთხოვნებს, თუ რას ნიშნავს სადა შეფუთვა, – ამბობს თამარ გაბუნია, – რაიმე საფუძველი, რომ გადავადებაზე ვისაუბროთ, არ არსებობს. პირიქით, ტარდება შეხვედრები ყველა მონაწილე მხარის ჩართულობით, რათა მოთხოვნები, რომელიც უკავშირდება თამბაქოს კონტროლს, რაც არის უკვე დადგენილი საქართველოს კანონმდებლობით, შესრულდეს.

ეს ასევე გვაახლოებს ევროკავშირის მოთხოვნებთან, ევროდირექტივებთან და არის ძალიან მნიშვნელოვანი, რათა პრევენციული ზომები, რაც თამბაქოს მოწევის შეწყვეტას და თამბაქოს მოწევით გამოწვეულ მთელ რიგ დაავადებებს უკავშირდება, თავიდან ავიცილოთ“.

ცვლილების მიხედვით, კოლოფის დიდ ნაწილს ჯანმრთელობის რისკების შესახებ გამაფრთხილებელი წარწერები და პიქტოგრამები დაიკავებს. ბრენდის სახელწოდება შეფუთვაზე ისევ იქნება, თუმცა ნაკლები ხილვადობით.