27 მაისს, 13:00 საათზე, სასწრაფო სამედიცინო დახმარების თანამშრომლები საგანგებო სიტუაციების კოორდინაციისა და გადაუდებელი დახმარების ცენტრთან აქციას გამართავენ.

ისინი ხელფასების მატებას და ღირსეულ სამუშაო პირობებს მოითხოვენ.

ხარაგაულის სასწრაფო-სამედიცინო დახმარების თანამშრომლები ამ აქციას დღეს ვერ შეუერთდებიან. ისინი ამბობენ, რომ ამ ეტაპზე აქციაში მხოლოდ თბილისის სასწრაფო სამედიცინო დახმარებისა და დედაქალაქთან ახლომდებარე რეგიონების ბრიგადები ჩაერთვებიან.

„კოვიდპანდემიის დროს ხელფასზე დანამატს ვიღებდით, – ამბობს ერთ-ერთი ექთანი, – ექთნისთვის ეს თანხა 500 ლარი, ექიმისთის 600 ლარი, ხოლო მძღოლისთის 400 ლარი იყო. აპრილის ხელფასი ამ დანამატის გარეშე ჩაგვერიცხა. კორონავირუსი ჯერ საბოლოოდ არ დაგვიმარცხებია. ახალ-ახალი ინფექციები გვემატება და ამ დროს ხელფასი კი არ უნდა დაგვაკლონ, უნდა მოგვიმატონ.

ჩვენი მოთხოვნა თუ არ შესრულდა, შემდგომ ეტაპზე აქციაში რეგიონების სასწრაფო-სამედიცინო სამსახურებიც ჩავერთვებით“.

აქციის მონაწილეთა ინტერესებს პროფკავშირების გაერთიანება იცავს. პროფკავშირები მზად არის მისი წევრი ორგანიზაციის – მედიცინის, ფარმაციისა და სოციალური დაცვის მუშაკთა პროფკავშირის და მისი წევრების მხარდასაჭერად.