სასწავლო წელი სრულდება და სკოლებში ინფრასტრუქტურისმოსაწესრიგებლად ხელსაყრელი პერიოდი იწყება. ხარაგაულის მუნიციპალიტეტში მოქმედი სკოლების ინფრასტრუქტურული პრობლემების მოსაგვარებლად წელს 100 ათასი ლარის გამოყოფა იგეგმება.

ხარაგაულის საგანმანათლებლო რესურსცენტრიდან მოპოვებული ინფორმაციით:

  • ხარაგაულში ხუთ საჯარო სკოლას (ვახანის, ბორის, ხუნევი-გედსამანიის, ვარძიის) სრული რეაბილიტაცია სჭირდება;
  • წყალაფორეთისა და საღანძილის საჯარო სკოლებისთვის, ასევე – ზვარეს საჯარო სკოლის ჩრდილის დაწყებითი კლასებისთვის შენობები ხელახლა ასაშენებელია;
  • ხიდრის, ხევის, სარგვეშის, გედსამანიის სკოლების შენობებში, ასევე – ლეღვნის საჯარო სკოლის დიდვაკის დაწყებითი კლასების კორპუსში კარ-ფანჯარაა შესაცვლელი;
  • ხარაგაულის #2, ბაზალეთის, წიფის, ხუნევი-გედსამანიის სკოლების შენობები გადასახურია;
  • კოსმეტიკური რემონტი ესაჭიროება ხარაგაულის #2, ბაზალეთის, ღორეშისა და ზვარეს საჯარო სკოლების შენობებს;
  • ბორითისა და ხარაგაულის #3 საჯარო სკოლებში ეზოებია მოსაწყობი;
  • სპორტული მოედანი ესაჭიროება ხარაგაულის #2, ვაშლევისა და ნადაბურის საჯარო სკოლებს;
  • ხევისა და გედსამანიის სკოლების შენობებში იატაკია შესაცვლელი, ბორითის სკოლაში კი – ელექტროგაყვანილობა. ხარაგაულის #2 საჯარო სკოლას ოთახების მიშენება სჭირდება.

სკოლებში ინფრასტრუქტურული პრობლემების მოსაგვარებლად წელს ხარაგაულის მუნიციპალიტეტისთვის ცენტრალური ბიუჯეტიდან გამოყოფილი 100 ათასი ლარით ხარაგაულის თვითმართველობა აპირებს:

1) ხუნევის სკოლის სახურავის რეაბილიტაციას – სამშენებლო სამუშაოების საორიენტაციო ღირებულებაა 50 ათასი ლარი;

2) ხუნევის სკოლასთან შერწყმული გედსამანიის კორპუსის სახურავის რეაბილიტაციას – სამშენებლო სამუშაოების საორიენტაციო ღირებულებაა 35 ათასი ლარი;

3) ხევის სკოლის დაზიანებული კარ-ფანჯრების, იატაკის ნაწილობრივ შეცვლას და დრენაჟის მოწყობას – სამშენებლო სამუშაოების საორიენტაციო ღირებულებაა 50 ათასი ლარი.

ამ პროექტების განსახორციელებლად საპროექტო-სახარჯთაღრიცხვო დოკუმენტაცია უკვე მომზადებულია.

„ხარაგაულში სკოლების ინფრასტრუქტურულ მდგომარეობაზე განათლების სამინისტრო და სამხარეო ადმინისტრაცია ინფორმირებულია, – ამბობს ხარაგაულის საგანმანათლებლო რესურსცენტრის უფროსი მარინა ვეფხვაძე, – ამ ეტაპზე მხოლოდ 100 ათასი ლარი გამოგვეყო, რომელიც დღე-დღეზე ჩაირიცხება. ამ სამ სკოლაში უმძიმესი მდგომარეობაა. შევეცადეთ, თანხა მაქსიმალურად ეფექტურად გამოგვეყენებია. გაისად ყველაფერი უნდა გავაკეთოთ იმისათვის, რომ ბორისა და ვახანის საჯარო სკოლებს სრული რეაბილიტაცია ჩაუტარდეთ“.

ფოტოზე: ხუნევის საჯარო სკოლა