ხარაგაულის ოთარ აბაშიძის სახელობის სახალხო თეატრმა კიდევ ერთი წარმატება და აღიარება მოიპოვა.

ირინე ჩხეიძის რეჟისორობით დადგმული საბავშვო სპექტაკლი „სათაგური“ მოსწავლეთა და სტუდენტთა სამოყვარულო თეატრალური ფესტივალის გამარჯვებულია.

ფესტივალი 1-7 აპრილს საქართველოს ტექნიკური უნივერსიტეტის თეატრ-სტუდია „მოდი ნახეს“ (ხელმძღვანელი ნუგზარ ბუცხრიკიძე) ორგანიზებით გაიმართა და მასში ორი სტუდენტური დასი და ათი საბავშვო თეატრი მონაწილეობდა.

ფესტივალის ჟიურის თავმჯდომარე გახლდათ თეატრმცოდნე ნიკა წულუკიძე, ჟიურის წევრები: ჯემალ სეფიაშვილი, ცისო კობახიძე, გოგა გეგელია, ვაჟა პაპასკირი, ნანა ხურითი.

„თორმეტი წელია, რაც ეს ფესტივალი ტარდება. ხარაგაულის თეატრი პირველად მონაწილეობდა, – ამბობს რეჟისორი ირინე ჩხეიძე, – ძალიან საინტერესო გამოცდილება მივიღეთ. სპექტაკლმა თბილისელი მაყურებლებისა და დედაქალაქში მცხოვრები ხარაგაულელების დიდი მოწონება დაიმსახურა.

ვულოცავ სპექტაკლის მონაწილეებს და დასის წევრებს ამ წარმატებას.“