ხარაგაულში, სამგლიის სერზე ემერჯენს ამბულატორიის მშენებლობა დასრულდა. ეს ინფორმაცია პროექტის შემსრულებელი ორგანიზაციის, – სამშენებლო კომპანია შპს „აი-სი-ი-ეს“ პროექტის მენეჯერმა გიორგი მორჩილაძემ მოგვაწოდა. მისივე ინფორმაციით, ხარაგაულში ემერჯენს ამბულატორიის მშენებლობაზე 367 ათასი ლარი დაიხარჯა.

ხარაგაულის მაჟორიტარი დეპუტატის ნოდარ ებანოიძის ინფორმაციით, ემერჯენს ამბულატორიის ჩაბარების შემდეგ სამგლიის სერზე საავადმყოფოს მშენებლობა დაიწყება. „სახელმწიფო ბიუჯეტში გათვალისწინებულია ხარაგაულში საავადმყოფოს მშენებლობა, რაც 2015 წლის ბოლომდე უნდა დასრულდეს,“ – ამბობს ნოდარ ებანოიძე.

ახალი საავადმყოფოს მშენებლობისთვის გამოიყენება სამგლიის სერზე მშენებარე ნაგებობა.