მარგვეთისა და უბისის ეპისკოპოსის, მეუფე მელქისედეკის ლოცვა-კურთხევით, ხარაგაულის მუნიციპალიტეტის სოფელ ღარიხევში ეკლესიის მშენებლობას ჩაეყარა საფუძველი.

ტაძრის საძირკველი ხარაგაულის საკათედრო ტაძრის წინამძღვარმა, მამა თომამ (ლაცაბიძე) და ხარაგაულის სასულიერო გიმნაზიის აღმასრულებელმა დირექტორმა მამა პავლემ (ცერცვაძე) აკურთხეს.

მე-20 საუკუნის დასაწყისში ღარიხევში, ამ ადგილას ეკლესია არსებობდა, მაგრამ კომუნისტური რეჟიმის დროს ის დაანგრიეს და საზოგადოებრივი დანიშნულების შენობა (კლუბი და ბიბლიოთეკა) ააგეს.

იმ ადგილზე კვლავ ეკლესიის – ბაზილიკის ტიპის წმინდა გიორგის სახელობის ტაძრის აშენება იგეგმება.

ღარიხევში ეკლესიის მშენებლობა ლაშა დეკანოსიძის ინიციატივითა და ფინანსური მხარდაჭერით დაიწყო. ის წარმოშობით ღარიხევიდანაა და ამერიკაში ცხოვრობს. ეკლესიის მშენებლობაში ადგილობრივი მოსახლეობაც აქტიურად ჩაერთვება.