ხარაგაულის მუნიციპალიტეტში არსებული ოცდაერთივე საბავშვო ბაღი ამ დრომდე დახურულია.

აქ სწავლა 15 ნოემბერს უნდა განახლებულიყო. ხარაგაულის სკოლამდელ დაწესებულებათა გაერთიანების დირექტორის, მამუკა ჭიპაშვილის  ინფორმაციით, სწავლა 1 დეკემბრამდე ვერ განახლდება. ამის მიზეზი ხარაგაულის მუნიციპალიტეტში არსებული რთული ეპიდემიოლოგიური ვითარება და ვაქცინაციის დაბალი დონეა.

“დღეს დილიდან საზოგადოებრივი ჯანდაცვის ცენტრის წარმომადგენლებთან  კონსულტაცია გავიარე . სოფლებში არსებული ვითარება მოვიკითხე. ფაქტობრივად ყველგან საგანგაშო მდგომარეობაა. ამის გამო იძულებულნი ვართ სასწავლო- სააღმზრდელო პროცესი გადავწიოთ.

ამ პერიოდის განმავლობაში იქნებ მოვახერხოთ და საბავშვო ბაღებში თანამშრომელთა ვაქცინაციის მაჩვენებელი, რომელიც ამჟამად 40 %-ია, როგორმე გავზარდოთ. მაქსიმალურად მოვუწოდებთ აღმზრდელებსა და მშობლებს. კონკრეტული ნაბიჯი თუ არ გადავდგით და არ ავიცერით, მომავალშიც ასეთ მდგომარეობაში ვიქნებით. საბავშვო ბაღებში აღსაზრდელებს მაქსიმალურად უსაფრთხო გარემო უნდა დავახვედროთ”- ამბობს მამუკა ჭიპაშვილი.