დაავადებათა კონტროლის ეროვნული ცენტრის წარმომადგენლები საუბრობენ იმაზე, რომ საქართველოში კორონავირუსის ე.წ. „მეხუთე ტალღა“ დაიწყო.

ამას კორონავირუსით ინფიცირების  მზარდი სტატისტიკა მოწმობს. ყოველდღიურად იზრდება ინციდენტობის, დადებითობისა და რეპროდუქციის ინდექსი.

ეს გაზრდილი სტატისტიკა ხარაგაულის მუნიციპალიტეტშიც საგრძნობია. 16 და 17 ოქტომბერს ხარაგაულში ინფიცირების 61 ახალი შემთხვევა დადასტურდა, გამოჯანმრთელდა 15 ადამიანი.

ხარაგაულში კორონავირუსის პირველად დადასტურებიდან ამ დრომდე სულ გარდაცვლილია 25 ინფიცირებული.

ამჟამად ხარაგაულში 265 ადამიანი ებრძვის კორონავირუსს. აქედან 32 საავადმყოფოში, ხოლო დანარჩენი ბინაზე, ექიმის მეთვალყურეობის ქვეშ იმყოფება.

ინფიცირებულთა რაოდენობის მომატება პირდაპირ კავშირშია ტესტირების ზრდასთან. ხარაგაულში დღიურად დაახლოებით 300 ადამიანი იტესტება.

ხარაგაულის საზოგადოებრივი ჯანდაცვის ცენტრის ექიმი ირინე გელაშვილი ამბობს, რომ ეს ციფრი, წინა თვესთან შედარებით, გაორმაგებულია.