2022 წლის სახელმწიფო ბიუჯეტის პრიორიტეტები, მიმდინარე წლის ბიუჯეტის მსგავსად, ისევ ჯანდაცვა, სოციალური სფერო და ინფრასტრქტურული პროექტებია.

ფინანსთა მინისტრის მოადგილე გიორგი კაკაურიძემ მომავალი წლის ბიუჯეტის პროექტი პარლამენტში კომიტეტების გაერთიანებულ სხდომაზე წარადგინა.

ბიუჯეტის პროექტის თანახმად, 2022 წლის ბიუჯეტის საშემოსავლო ნაწილი 13 930 მლნ. ლარით, ხოლო ხარჯვითი ნაწილი – 18. 443 მლნ ლარით განისაზღვრა.

მომავალ წელს, ასაკობრივი ჯგუფების მიხედვით, პენსია 20-25 ლარით იზრდება. სოციალური დაცვის მიმართულებით ბიუჯეტში 4 მლრდ ლარი იგეგმება.

70 წლამდე ასაკის მოქალაქეებისთვის პენსია 20 ლარით მოიმატებს და 260 ლარამდე გაიზრდება.

70 წლის და მეტი ასაკის პირთათვის პენსია 25 ლარით იზრდება და 300 ლარით განისაზღვრება.

მაღალმთიან დასახლებაში მცხოვრები პენსიონერებითვის პენსიის მოცულობა 70 წლამდე ასაკის პირთათვის გახდება 312 ლარი, ხოლო 70 წლის და მეტი ასაკის პირთათვის – 360 ლარი.