მუშავდება თუ არა მკურნალობის ახალი პროტოკოლი კოვიდინფიცირებული ორსულების მიმართ, „ჩემი ხარაგაულის“ ამ შეკითხვაზე დაავადებათა კონტროლის ეროვნული ცენტრის დირექტორმა ამირან გამყრელიძემ გვიპასუხა, რომ მეანგინეკოლოგთა ასოციაცია ამ საკითხზე მუშაობს.

„ახალი პროტოკოლი ორსულთა მოვლასა და მკურნალობას ეხება და მომავალ კვირაში გამოქვეყნდება, – ამბობს ამირან გამყრელიძე, – კორონავირუსის „დელტა“ შტამი ორსულების მიმართ ძალიან ვერაგი აღმოჩნდა.

2021 წელს საქართველოში კოვიდინფიცირებული 14 ორსული გარდაიცვალა.

კიდევ ერთხელ გთხოვთ, რომ ყველა ორსული მივიდეს და აიცრას პფაიზერით. ორივე აცრა ჩაიტაროს ორსულობის ნებისმიერ ტრიმესტრში.

აცრა 25-ჯერ და მეტად შეამცირებს მათი დაინფიცირების რისკს და დაავადების შემთხვევაში – გართულებების რისკს. ამჟამად ქვეყანაში 20-დან 25 ათასამდე ორსულია“.

ნინო კაპანაძე