ხარაგაულის მუნიციპალიტეტის თერთმეტ საჯარო სკოლაში განათლებისა და მეცნიერების სამინისტრომ დირექტორების შესარჩევი კონკურსი გამოცხადდა.

კონკურსში მონაწილეობა შეუძლიათ მხოლოდ დირექტორობის სერტიფიკატის მქონე პირებს.

დირექტორების შესარჩევად კონკურსი გამოცხადდა ხარაგაულის #2, ბაზალეთის, ბორითის, ვარძიის, ვაშლევის, ვახანის, ლაშის, ლეღვანის, სარგვეშის, წყალაფორეთისა და ხიდრის საჯარო სკოლებში.

კონკურსში მონაწილეობის მისაღებად დირექტორის სერტიფიკატის მქონე პირებმა უნდა შეავსონ განაცხადის ფორმა ვებგვერდზე www.directors.mes.gov.ge.

ელექტრონული განაცხადის შევსება შესაძლებელი იქნება 16-დან 19 თებერვლამდე. რეგისტრაციის ბმული გაიხსნება 16 თებერვალს 10:00 საათზე.

კონკურსანტებს შეეძლებათ მონიშნონ ის 3 სკოლა, სადაც კონკურსში მონაწილეობის სურვილი აქვთ. ამასთან, არ არის შეზღუდული ერთხელ მონიშნული სკოლის შეცვლა. 19 თებერვალს მონიშნული სკოლები იქნება საბოლოოდ დამტკიცებული ასარჩევი ნუსხა.

ელექტრონული რეგისტრაციისთვის სავალდებულო დოკუმენტებია: პირადობის დამადასტურებელი დოკუმენტი, ფოტოსურათი და სამოტივაციო წერილი.

დირექტორების შესარჩევად კონკურსი საქართველოს მასშტაბით 978 სკოლაშია გამოცხადებული.