დაავადებათა კონტროლის ეროვნული ცენტრის სამეცნიერო დირექტორის, პაატა იმნაძის ინფორმაციით, საქართველოში კორონავირუსით ერთდროულად დაინფიცირების მაღალი მაჩვენებელია – დღეისათვის ქვეყანაში covid-19-ით დაახლოებით 50 ათასი ადამიანია დაავადებული.

მისივე თქმით, რადგან დადებითობის მაჩვენებელი 10%-ია, შეიძლება ითქვას, რომ ყოველი 50-ე – მე-60 ადამიანი ინფიცირებულია.

„ეს არის რეალობა და საკმაოდ მძიმე სიტუაცია გვაქვს, – აღნიშნა პაატა იმნაძემ ჟურნალისტებისთვის გამართულ ვებინარზე, – 100 ათას მოსახლეზე ჩვენ ხუთჯერ უფრო რთული მდგომარეობა გვაქვს, ვიდრე იყო ინდოეთში.

ჩვენი ჯანდაცვის სისტემა, ჯერჯერობით, ამ მდგომარეობას უძლებს, მაგრამ მალე, თუ ასე გაგრძელდა, ჩემი კოლეგების ფიზიკური რესურსი ამოიწურება. ამიტომ დაწესდა შეზღუდვები და გამკაცრდა რეგულაციების აღსრულების მექანიზმი.

თუ შევძლებთ, რომ პირბადის ტარების მაჩვენებელი 90-95%-მდე გაიზარდოს, მაშინ ახალი შემთხვევების რაოდენობა 30%-ით შემცირდება“.