ხარაგაულში მატულობს იმ პირთა რიცხვი, რომელთა კორონავირუსით ინფიცირების წყარო უცნობია.

ბოლო 24 საათში ხარაგაულში კოვიდ-19-ით ინფიცირების 8 ახალი შემთხვევა დაფიქსირდა. მათგან სამი უბისაში ერთი ოჯახის წევრია. თითო-თითო ინფიცირებულია ღუდუმექეთში, ღარიხევში, ჩალხაეთში, ხუნევსა და დაბა ხარაგაულში. მათგან მხოლოდ ღარიხევში მცხოვრებმა პირმა იცის, თუ ვისგან გადაედო ვირუსი.

4 აგვისტოს მონაცემებით, ხარაგაულში კორონავირუსის პირველად დაფიქსირებიდან დღემდე, კოვიდ-19-ის 800 შემთხვევა გამოვლინდა, მათგან 700 პირი გამოჯანმრთელდა, 16 – გარდაიცვალა.

84 ინფიცირებულიდან 23 საავადმყოფოში მკურნალობს, ორი კოვიდსასტუმროში, დანარჩენები ბინაზე, ოჯახის ექიმის მეთვალყურეობის ქვეშ იმყოფებიან.

ხარაგაულში თვითიზოლაციაში 138 პირი იმყოფება. საზოგადოებრივი ჯანდაცვის ცენტრისგან მოპოვებული ინფორმაციით, მიმდინარეობს ინფიცირებულთა კონტაქტების მოძიება და დღის ბოლომდე იზოლაციაში მყოფთა რიცხვი გაიზრდება.