საზოგადოებრივი ჯანმრთელობის ეროვნული ცენტრის გადამდებ დაავადებათა დეპარტამენტის უფროსი ხათუნა ზახაშვილი კონკრეტულ თარიღს, თუ როდის დაიწყებენ სოფლის ექიმები კორონავირუსის საწინააღმდეგო აცრებს, ვერ აკონკრეტებს.

„ზუსტ თარიღს ვერ დავასახელებ, მაგრამ ეს იქნება ძალიან მალე, – ამბობს ხათუნა ზახაშვილი, – ყველა ამბულატორიის ექიმს ჩაუტარდა შესაბამისი ტრენინგი ამ ვაქცინაციასთან დაკავშირებით.

საორგანიზაციო საკითხებია მოსაგვარებელი – სოფლის ექიმებმა უნდა განსაზღვრონ, რა ვადებში შეძლებენ კონკრეტულ სოფელში მოსახლეობის ვაქცინაციას, რამდენ პირს აცრიან დღიურად და ა. შ. ამის შემდეგ მათ საზოგადოებრივი ჯანდაცვის ცენტრიდან ვაქცინები მიეწოდებათ.

ეს აცრები განსხვავებულია სხვა დანარჩენისგან. ექიმებს დიდი ძალისხმევა დასჭირდებათ იმისთვის, რომ დაარწმუნონ მოსახლეობა ვაქცინაციის სიკეთეში და ვაქცინაცია მობილიზებულებმა დაიწყონ“.