დღეს აბიტურიენტები ქართული ენისა და ლიტერატურის გამოცდას აბარებენ.

საქართველოს მასშტაბით გახსნილ ოცდახუთივე საგამოცდო ცენტრში ქართული ენისა და ლიტერატურის გამოცდა მშვიდ ვითარებაში მიმდინარეობს.

გამოცდების ეროვნული ცენტრის ინფორმაციით, დილის სესიაზე დარეგისტრირებული აბიტურიენტების 94% გამოცხადდა. ოთხმა აბიტურიენტმა დაიგვიანა. ქართული ენისა და ლიტერატურის გამოცდის მეორე სესიისათვის რეგისტრაცია 14:00 საათზე დაიწყება.

ერთიანი ეროვნული გამოცდებისათვის რეგისტრაცია 38 400-ზე მეტმა აბიტურიენტმა გაიარა; სტუდენტთა საგრანტო კონკურსში მონაწილეობის სურვილი 3 700-ზე მეტმა სტუდენტმა გამოთქვა; საერთო სამაგისტრო გამოცდისათვის 12 800-ზე მეტი მაგისტრანტობის კანდიდატია დარეგისტრირებული.

შეფასების და გამოცდების ეროვნულ ცენტრში აცხადებენ, რომ გამოცდები წელსაც კოვიდპანდემიასთან დაკავშირებული ყველა რეგულაციის დაცვით ჩატარდება. აბიტურიენტებს, რომლებსაც დადასტურებული ექნებათ კორონავირუსი, გამოცდებს მოგვიანებით, სპეციალურად დანიშნულ სესიაზე ჩააბარებენ.

შეფასებისა და გამოცდების ეროვნული ცენტრის დირექტორი სოფიო გორგოძე 2021 წლის გამოცდების მონაწილეებს მიმართავს:

„მინდა კიდევ ერთხელ მოგმართოთ თხოვნით, რომ ყურადღებით გაეცნოთ საგამოცდო ბარათზე მითითებულ გამოცდის თარიღს, სესიაზე გამოცხადების დროს და საგამოცდო ცენტრის მისამართს.
ცენტრში წასაღებად მოამზადეთ პირადობის დამადასტურებელი მოწმობა და საგამოცდო ბარათი. სურვილის შემთხვევაში თან იქონიეთ წყალი, საკუთარი შავი გელიანი კალამი და სათადარიგო პირბადე. ტესტირების წინა საღამოს, გირჩევთ, დაისვენოთ.
ცენტრში დაგხვდებათ კეთილგანწყობილი პერსონალი. ისინი იზრუნებენ, რომ პანდემიის გამო დაწესებული რეგულაციების მიუხედავად, შეგიქმნან გარემო, სადაც მაქსიმალურად შეძლებთ გამოავლინოთ თქვენი ცოდნა და შესაძლებლობები“.
წარმატებებს ვისურვებთ აბიტურიენტებს.