დაავადებათა კონტროლის ეროვნული ცენტრი კორონავირუსის საწინააღმდეგო აცრების შეფერხებასთან დაკავშირებით განცხადებას ავრცელებს.

განცხადებაში ნათქვამია:

  • მოქალაქეებისთვის ასტრაზენეკას ვაქცინით მეორე დოზით აცრა მოხდება პირველი დოზიდან 10-12 კვირის ინტერვალში;
  • ისინი, ვინც უკვე დარეგისტრირდნენ ასტრაზენეკათი რევაქცინაციისთვის პირველი დოზიდან 10-12 კვირის შუალედში, მათთვის არ იცვლება არაფერი. არჩეულ დროსა და კლინიკაში შეუძლიათ გაიკეთონ აცრა;
  • მათ, ვინც მიიღო შეტყობინება ჯავშნის ცვლილების შესახებ, შეუძლიათ ხელახლა დარეგისტრირდნენ პირველი დოზიდან 10-12 კვირის ინტერვალში;
  • მათ, ვისაც რევაქცინაციაზე ჯავშანი ჯერ არ გაუკეთებია, შეუძლიათ ჯავშანი გააკეთონ ასევე 10-12 კვირის ინტერვალში ვებგვერდზე booking.moh.gov.ge ან დარეკეთ ნომერზე 1522.

ჩვენი გუნდი მადლობას გიხდით მოთმინებისთვის და ბოდიშს – შექმნილი შეფერხებისთვის.

დაავადებათა კონტროლის ეროვნული ცენტრის დირექტორმა, ამირან გამყრელიძემ დღეს ბრიფინგზე განმარტა, რომ საქართველომ „კოვაქსის“ პლატფორმიდან „ასტრაზენეკას“ ვაქცინა ორჯერ მიიღო – 13 მარტს 43 200, მეორედ ამდენივე აპრილის შუა რიცხვებში. მესამე პარტია უნდა შემოსულიყო ჯერ მაისის შუა რიცხვებში, შემდეგ 22 ივნისს.

ამირან გამყრელიძის ინფორმაციით, საქართველოს მთავრობასა და ვაქცინის მწარმოებელ კომპანიებს შორის გაფორმებული ხელშეკრულებებით, კოვაქსის პლატფორმის ფარგლებში ივლისიდან 3 მილიონ დოზაზე მეტი ვაქცინა ეტაპობრივად მოგვეწოდება.

24 ივნისის მონაცემებით საქართველოში ჯამურად ჩატარდა 245 380 აცრა. სრულად ვაქცინირებულია 88 754 ადამიანი.