ახალი რეგულაციის მიხედვით, ბიზნესოპერატორებს, რომლებიც საცალო ვაჭრობის პუნქტებში ახორციელებენ სურსათის წარმოება-გადამუშავებას, ეკისრებათ ვალდებულება, საქმიანობა  HACCP-ის პრინციპების შესაბამისად აწარმოონ.

რეგულაციების აღსრულებაზე კონტროლს სურსათის ეროვნული სააგენტო ახორციელებს. პარალელურად სააგენტო, ინფორმირებულობის გაზრდის მიზნით, აქტიურად თანამშრომლობს  ბიზნესსექტორთან.

HACCP-ის სისტემის პრინციპების დაცვა საქართველოში 2015 წლიდან სავალდებულოა ნედლი რძის გადამამუშავებელ საწარმოებსა და სასაკლაოებში; 2018 წლიდან სისტემის დანერგვის ვალდებულება დაეკისრათ იმ  ბიზნესოპერატორებს, რომლებიც  ექსპორტისთვის განკუთვნილ გადამუშავებული თხილის გულს ამზადებენ; 2021 წლის პირველი იანვრიდან სავალდებულოა იმ ბიზნესოპერატორებისთვის, რომლებიც  ახორციელებენ ცხოველური წარმოშობის სურსათის წარმოებას ან/და გადამუშავებას (ხორცი და ხორცის პროდუქტები, რძის ფხვნილზე დამზადებული სურსათი, თევზი და თევზის პროდუქტები, კვერცხი და კვერცხის პროდუქტები, თაფლი).

HACCP-ის სისტემის პრინციპები საწარმოში სურსათის უვნებლობის ყველა საფრთხის წინასწარ გამოვლენას, აღმოფხვრას ან ამ საფრთხეების პრევენციის პროცედურების სისტემის ჩამოყალიბებას და სისტემატიურად განხორციელებას ნიშნავს.