საქართველოში ბოლო პერიოდში სახეზეა კორონავირუსით ინფიცირების მაჩვენებლის ზრდა.

ამასთანავე იზრდება ჰოსპიტალიზაციის მაჩვენებელიც. აქედან გამომდინარე, უწყებათაშორისმა საკოორდინაციო საბჭომ მიიღო გარკვეული გადაწყვეტილებები:

  • აღდგომის დღეებში სასაფლაოზე გასვლა აიკრძალება – ჩაიკეტება სასაფლაოზე მისასვლელი გზები;
  • მობილობის შემცირების მიზნით 4 მაისიდან 11 მაისამდე შეიზღუდება მუნიციპალური ტრანსპორტის მოძრაობა.

სააღდგომო ლიტურგიასთან დაკავშირებით გადაადგილებაზე დაწესებული შეზღუდვა იმოქმედებს 1 მაისის 23:00 საათიდან 2 მაისის 04:00 საათამდე. საქართველოს საპატრიარქოსთან კოორდინაციით, ეპიდემიოლოგიური ნორმების მკაცრი დაცვა მოხდება. ტაძრებში დამონტაჟდება გახმოვანების სისტემა, დაცული იქნება სოციალური დისტანცია და პირბადის მოხმარების წესი.

უწყებათაშორისმა საკოორდინაციო საბჭომ მიიღო გადაწყვეტილება, რომ განსაზღვრული ჯგუფების ტესტირება მაისის განმავლობაშიც სახელმწიფოს დაფინანსებით გაგრძელდება.

საქართველოს პრემიერ მინისტრის ხელმძღვანელობით ჯანდაცვის სამინისტრომ შეიმუშავა გეგმა, რომლის მიხედვითაც ქვეყანაში საკმარისი რაოდენობით იქნება საწოლფონდი, მედიკამენტები, ჟანგბადის აპარატები და ტესტები. ქვეყანა ყველაზე ცუდი სცენარისთვისაც მზად არის.