დღეს, 14 აპრილს, ხარაგაულის სპორტსკოლაში მუნიციპალიტეტის ღია პირველობა გრეჰეტბოლში ჩატარდა.

ჩემპიონატში 2004-2007 წლებში დაბადებული 14 მოზარდი მონაწილეობდა.

პირველ ადგილზე ლუკა გოგოლაძე გავიდა, მეორე ადგილი გიორგი ბუაჩიძემ, ხოლო მესამე ადგილი შოთა ვეფხვაძემ დაიკავა.

გამარჯვებულები სიგელებითა და მედლებით დაჯილდოვდნენ.

„გრეჰეტბოლი  – ფრენბურთი ფეხით. ამ სპორტის სახეობაში გაერთიანებულია ფეხბურთის, ჩოგბურთისა და ფრენბურთის ელემენტები, – ამბობს ხარაგაულის სპორტისა და შიდა ტურიზმის ცენტრის ფეხბურთის სექციის მწვრთნელი გოჩა გელაშვილი, – სპორტის ეს სახეობა საქართველოში შედარებით ახალი თამაშია.

გრეჰეტბოლი ნაკლებ კონტაქტური სპორტია, ამიტომ სპორტის ამ სახეობაში შეჯიბრი პანდემიიდან გამომდინარე შევარჩიეთ“.