ხარაგაულის მუნიციპალიტეტს ცენტრალური ბიუჯეტიდან სტიქიით დაზიანებული ინფრასტრუქტურის აღსადგენად 1 200 000 ლარი გამოეყო.

ამ თანხას ადგილობრივი ბიუჯეტიდან  177 400 ლარი დაემატება; ჯამში, 1 377 400 ლარი  2019 წლის ივნისში მომხდარი სტიქიის შედეგების სალიკვიდაციოდ მიიმართება. გთავაზობთ იმ პროექტების ჩამონათვალს, სავარაუდო ღირებულებებთან ერთად, რომელთა განხორციელებაც ამ თანხითაა განსაზღვრული.

  • ლეღვანში კობაბოურის უბანში ახალი სახიდე გადასასვლელის მოწყობა – 368 082 ლარი;
  • ხარაგაულის ბაზრის ტერიტორიაზე გზის ნაპირდამცავი კედელის მოწყობა – 470 213 ლარი;
  • ბორითში დაზიანებული ხიდებისა და მილხიდების აღდგენა – 177 400 ლარი;
  • მაქათუბანში ღელის წყლისაგან დაზიანებული ბეტონის გზის მონაკვეთის აღდგენა – 40 507 ლარი;
  • კვესრევში მილხიდის მოწყობა ღრმა ფრთებით – 26 546 ლარი;
  • კვესრევის სავანის უბანში ორი ხიდბოგირის მოწყობა – 34 520 ლარი;
  • ბორითში, ალედი ბარბაქაძის უბანში, სანიაღვრე არხის მოწყობა ცხაურით – 39 676 ლარი;
  • მაქათუბნის მაღაზიასთან მილხიდის მოწყობა – 18 170 ლარი;
  • ბორითის კურტანიძეების უბანში მილხიდის მოწყობა – 17 981 ლარი;
  • ლეღვანში ცენტრალურ გზაზე ნაპირდაცვითი კედლების (გაბიონების) მოწყობა  – 184 305 ლარი.

ხარაგაულის მერიის ინფრასტრუქტურის სამსახურის უფროსის მოვალეობის შემსრულებლის, პეტრე შარიქაძის, ინფორმაციით, ამ ობიექტებისათვის საპროექტო-სახარჯთაღრიცხვო დოკუმენტაცია შესყიდულია და სამშენებლო სამუშაოებისათვის ტენდერები უახლოეს მომავალში გამოცხადდება.

ფოტოზე:  ხარაგაულში ბაზრის ტერიტორიაზე დაზიანებული ნაპირდამცავი კედელი