სწავლის საკლასო ოთახებში განახლებას ხარაგაულის გიმნაზია სიახლით შეხვდა.

გიმნაზიის, იმ მოსწავლეებს, რომლებიც სოფლებიდან დადიან, ავტობუსი მოემსახურება.

„გიმნაზიის რექტორს, მარგვეთისა და უბისის ეპისკოპოსს მეუფე მელქისედეკს დიდი ხანია სურდა, რომ მოსწავლეებს ტრანსპორტი მომსახურებოდა, – ამბობს ხარაგაულის გიმნაზიის დირექტორი დეკანოზი პავლე (ცერცვაძე), – ავტობუსი სამი სოფლის – საქარიქედი, ფარცხნალი, ლაშე – ცენტრამდე მივა და მოსწავლეებს მიმდებარე სოფლებიდანაც წამოიყვანს.

მოსწავლეებს ყოველდღიურად გიმნაზიის მოსწავლეების ბაბუა – დავით ბარბაქაძე მოემსახურება. ის, ბავშვების სიყვარულის გამო, მინიმალურ ხელფასზე დაგვთანხმდა. თვეში ავტობუსს 0.5 ტონა დიზელი სჭირდება. იმედი გვაქვს კეთილი ადამიანები საწვავისა და ტექნიკური მომსახურების ხარჯებში თანადგომას გაგვიწევენ“.

„ჩემს შვილებს ყოველდღე 10 კილომეტრის გავლა უწევდათ,- ამბობს მშობელი ნატო წარიაშვილი, – საკუთარი ტრანსპორტი კი მყავს, მაგრამ ყოველდღიურად ახალსოფლიდან ბავშვები ვერ მომყავდა. დიდი მადლობა გიმნაზიის დირექციას. ახლა გაცილებით მშვიდად ვიქნები“.

თამთა გოგოლაძე