ხარაგაულის საზოგადოებრივი ჯანდაცვის ცენტრის ექიმის, ნინო ყიფშიძესგან მოპოვებული ინფორმაციით, ბოლო სამი დღის განმავლობაში მუნიციპალიტეტში ინფიცირების სამი ახალი შემთხვევა დადასტურდა.

ხარაგაულში კორონავირუსის დაფიქსირების პირველი შემთხვევიდან დღემდე დადასტურებულია 518 შემთხვევა, მათგან გამოჯანმრთელდა – 470, გარდაიცვალა – 11.

37 ინფიცირებულიდან სტაციონარში 4 პირი მკურნალობს. დანარჩენები ბინაზე – ოჯახის ექიმის მეთვალყურეობით. იზოლაციაში 16 მოქალაქე იმყოფება.

დღეს, 15 თებერვალს, PCR ტესტი ხარაგაულისა და ბორითის კლინიკის 30 თანამშრომელს და ხარაგაულის ჯანდაცვის ცენტრში მისულ 5 ცხელებიან პაციენტს ჩაუტარდა. პასუხები ხვალ გახდება ცნობილი.

16 თებერვალს სკოლების თანამშრომელთა ტესტირების მეორე ეტაპი დაიწყება. ყველა მასწავლებელს ტესტირება ყოველ ორ კვირაში ერთხელ ჩაუტარდება – 80%-ს – სწრაფი ტესტით, ხოლო 20%-ს – PCR ტესტირებით. კონკრეტული მასწავლებელი რომელი მეთოდით გაიტესტოს, ამის შესახებ გადაწყვეტილებას სკოლის დირექცია იღებს.

-ხარაგაულში ინფიცირებულთა რაოდენობა მცირდება და ახლა ძალიან მნიშვნელოვანია, რომ ეს ვითარება შევინარჩუნოთ, – ამბობს ნინო ყიფშიძე, – ამისთვის აუცილებელია პირბადის ტარება, დისტანციისა და პირადი ჰიგიენის დაცვა.