დაავადებათა კონტროლის ეროვნული ცენტრის ხელმძღვანელის, ამირან გამყრელიძის ინფორმაციით, ქვეყანაში გრიპის ვირუსმა ცირკულაცია უკვე დაიწყო. შესაბამისად, ის კვლავ მოუწოდებს მოქალაქეებს, პრევენციული ღონისძიებები უფრო აქტიურად დაიცვან.

კორონავირუსის გავრცელების მაჩვენებელმა ოდნავ დაბლა დაიწია. ეს კი იმის ინდიკატორია, რომ სტაბილიზაციის ნიშნები გამოჩნდა.

ამირან გამყრელიძის ინფორმაციით, საქართველოში გააქტიურდა B-ტიპის სეზონური გრიპი, რომელსაც კორონავირუსისთვის დამახასიათებელი სიმპტომები ახასიათებს.

„გამომდინარე იქიდან, რომ ადამიანებმა ისწავლეს პირადი ჰიგიენის დაცვა და სოციალური დისტანცია, შესაძლოა, გრიპის სეზონი რბილად წარიმართოს. ამასთან ერთად, რისკჯგუფებისთვის ქვეყანაში გამოყოფილია გრიპის საწინააღმდეგო ვაქცინა, რომელიც მათთვის სრულიად უფასოა.

დეკემბერში, იანვარსა და თებერვალში კვლავ აუცილებელი იქნება ყველგან ვატაროთ პირბადე. ის დაგვიცავს არა მხოლოდ კორონავირუსის ინფექციისგან, არამედ სეზონური გრიპისგან.

ამ ეტაპზე ქვეყანაში პირბადის ტარების მაჩვენებელი არის 75 % და თუ ჩვენ ამას 95%-მდე ავიყვანთ, კორონავირუსის შემთხვევები საგრძნობლად იკლებს.

მოვუწოდებ მოქალაქეებს, ისარგებლონ შესაძლებლობით და აიცრან გრიპის ვაქცინაზე. განსაკუთრებით კი ვთხოვ ორსულ ქალებს. სერიოზულად ფართოვდება კორონავირუსის  ტესტირება. თუ ადამიანს სიმპტომი აქვს, უნდა მივიდეს პოლიკლინიკაში. იქ მას გაუკეთებენ ანტიგენის ტესტს და პასუხს სულ რაღაც 15 წუთში გაიგებს“, – ამბობს ამირან გამყრელიძე.

ბოლო 24 საათის განმავლობაში გამოვლენილია ვირუსით ინფიცირების 4 673 ახალი დადასტურებული შემთხვევა. გამოჯანმრთელდა 3 893 პირი, ხოლო ჯამში გამოჯანმრთელებულთა რაოდენობა 141 392-მდე გაიზარდა. უკანასკნელი 24 საათის განმავლობაში გვაქვს კორონავირუსით გარდაცვალების 36 ახალი შემთხვევა. 2020 წლის 26 თებერვლიდან დღემდე საქართველოში კორონავირუსით 1 576 ადამიანი გარდაიცვალა.
დღეს გამოვლენილი ინფიცირების 4 673 ახალი შემთხვევიდან – თბილისში გამოვლენილია 1 729 შემთხვევა, აჭარაში – 339, იმერეთში – 673, ქვემო ქართლში – 419, შიდა ქართლში – 354, გურიაში – 126, სამეგრელო-ზემო სვანეთში – 388, კახეთში – 384, მცხეთა-მთიანეთში – 109, სამცხე-ჯავახეთში – 111, რაჭა-ლეჩხუმსა და ქვემო სვანეთში – 41.