არასამთავრობო ორგანიზაცია „კულტურა და კონტაქტები“ 18-დან 30 წლამდე ასაკის მოყვარულ და პროფესიონალ ფოტოგრაფებს იწვევს ფოტოკონკურსში მონაწილეობის მისაღებად.

ფოტოკონკურსი მიზნად ისახავს საქართველოში ფოტოგრაფიის, როგორც თანამედროვე ხელოვნების დარგის, განვითარებას და ახალგაზრდა ფოტოგრაფების პროფესიული ზრდის ხელშეწყობას, მათი გამოვლენით, მხარდაჭერითა და გაძლიერებით.

კონკურსის თემაა: „საქართველო – ფოტოებით მოთხრობილი ისტორიები“.

მონაწილეები თავისუფალნი არიან თემის ინტერპრეტაციაში, კრეატიულ მიდგომასა და ნამუშევრის ესთეტიკაში.

კონკურსის ჟიური ფოტოგრაფიის სფეროში საერთაშორისოდ აღიარებული პროფესიონალებისგან შედგება:

  • ტომას დვორჟაკი – ფოტოგრაფი, ფოტო სააგენტო MAGNUM PHOTOS პრეზიდენტი;
  • მერიენ გოლონი – Washington Post-ის ფოტოგრაფიის განყოფილების ხელმძღვანელი და მთავარი ფოტო რედაქტორი;
  • ალესია გლავიანო – Vogue Italia-ს მთავარი ფოტო რედაქტორი;
  • აზუ ნვაგბოგუ – African Artists’ Foundation (AAF)-სა და LagosPhoto Festival-ის დამფუძნებელი და დირექტორი;
  • ნათელა გრიგალაშვილი – დამოუკიდებელი ფოტოდოკუმენტალისტი და ფოტოჟურნალისტი.

კონკურსში განაცხადების მიღების ბოლო ვადაა 2021 წლის 31 იანვარი. გამარჯვებულთა ვინაობა 2021 წლის გაზაფხულზე გახდება ცნობილი.

კონკურსის კატეგორიები და ჯილდოები

კონკურსის ფარგლებში შესაძლებელია, როგორც დასრულებული, ასევე მიმდინარე ფოტო პროექტების გამოგზავნა. ფოტო სერიები შეიძლება იყოს ნებისმიერი ჟანრიდან – დოკუმენტური, კონცეპტუალური, რეპორტაჟი.

კონკურსანტებმა უნდა მიუთითონ თუ რომელ კატეგორიაში იღებენ მონაწილეობას. ფოტო კონკურსის კატეგორიებია:

  1. პროფესიონალ ფოტოგრაფთა კატეგორიაში მონაწილეობა შეუძლიათ მხოლოდ პროფესიონალ ფოტოგრაფებს. თითოეულ მონაწილეს მხოლოდ ერთი ფოტო სერიის გამოგზავნის უფლება აქვს.
  2. მოყვარულ ფოტოგრაფთა კატეგორიაში, მხოლოდ მოყვარულებს. თითოეულ მონაწილეს მხოლოდ ერთი ფოტო სერიის გამოგზავნის უფლება აქვს.
  3. ერთი კადრის კატეგორიაში მონაწილეობა შეუძლიათ როგორც პროფესიონალ, ასევე მოყვარულ ფოტოგრაფებს. ამ კატეგორიაში თითოეულ მონაწილეს მაქსიმუმ სამი ინდივიდუალური ფოტოს გამოგზავნის უფლება აქვს.

კონკურსის პრიზები:

პრიზები პროფესიონალ ფოტოგრაფთა კატეგორიაში გამარჯვებულთათვის:

  • I ადგილი – 10 000 ლარი;
  • II ადგილი – 7 000 ლარი;
  • III ადგილი – 4 000 ლარი.

პრიზები მოყვარულ ფოტოგრაფთა კატეგორიაში გამარჯვებულთათვის:

  • I ადგილი – 7 000;
  • II ადგილი – 5 000 ლარი;
  • III ადგილი – 3 000 ლარი.

პრიზები ერთი კადრის კატეგორიაში გამარჯვებული მონაწილეებისთვის:

  • I ადგილი – 3 000 ლარი;
  • II ადგილი – 2 000 ლარი;
  • III ადგილი – 1 000 ლარი.

ფოტოკონკურსი ქუთაისის საერთაშორისო უნივერსიტეტის მხარდაჭერითა და საერთაშორისო საქველმოქმედო ფონდი „ქართუს“ დაფინანსებით ტარდება.

დეტალური ინფორმაციისთვის ეწვიეთ ვებგვერდს – www.kiuphoto.com ან დაუკავშირდით საკონტაქტო პირს, მირა გრიგალაშვილს – info@kiuphoto.com, ტელ.: 595 59 60 30.