ხარაგაულის #2 საჯარო სკოლა და ხარაგაულის გიმნაზია 9 ნოემბრიდან, ერთი კვირით, სასწავლო პროცესს დისტანციურად გააგრძელებენ.

ეს ინფორმაცია ხარაგაულის საგანმანათლებლო რესურსცენტრის უფროსმა მარინა ვეფხვაძემ დაგვიდასტურა.

დღეს, 7 ნოემბერს, ხარაგაულში კორონავირუსის სამი ახალი შემთხვევა დადასტურდა. მათგან ერთი ხარაგაულის #3 საჯარო სკოლის პედაგოგია, ხოლო ორი – ამავე სკოლის მოსწავლეები არიან.

ხარაგაულის #3 საჯარო სკოლა, უკვე რამდენიმე დღეა, დისტანციურ სწავლებაზეა გადასული.

ხარაგაულის #2 საჯარო სკოლისა და გიმნაზიის დისტანციურ სწავლებაზე გადასვლით, კორონავირუსის გავრცელების რისკი უნდა შემცირდეს.

9 ნოემბრიდან 16 ნოემბრამდე სააღმზრდელო პროცესი ასევე შეწყდება ხარაგაულის მუნიციპალიტეტში მოქმედ ოცივე საბავშვო ბაღში.

ხარაგაულში, პირველად დაფიქსირებიდან დღემდე, კორონავირუსით სულ 28 პირი დაავადდა. მათგან, ჯერჯერობით, მხოლოდ 4 გამოჯანმრთელდა. დღეისათვის თვითიზოლაციაში 74 ადამიანი იმყოფება.

ყველას ჯანმრთელობასა და სიმშვიდეს გისურვებთ და ეპიდემიოლოგების რეკომენდაციების დაცვას გირჩევთ – დახურულ და ღია სივრცეებშიც ვატაროთ პირბადე, დავიცვათ დისტანცია და პირადი ჰიგიენა.

ყველაფერი კარგად იქნება!