დაავადებათა კონტროლის ეროვნული ცენტრის ხელმძღვანელმა ამირან გამყრელიძემ კორონავირუსის პრევენციისათვის ხუთ ძირითად ღონისძიებაზე ისაუბრა.

„გლობალურად ინფიცირებულთა რაოდენობა 47 მილიონს მიახლოვდა, – ამბობს ამირან გამყრელიძე, – დღეს მსოფლიოში 437 ათასი დაინფიცირდა. სამწუხაროდ, კორონავირუსით გარდაცვლილია 1 200 000 პაციენტი.

მსოფლიოში კორონავირუსით დაავადებულთა მილიონიან მაჩვენებელს უკვე გადასცილდა ცხრა ქვეყანა, მათ შორის ოთხი ევროპაში – დიდი ბრიტანეთი, საფრანგეთი, ესპანეთი, რუსეთი.

ინფიცირების მზარდი მაჩვენებელია ყოველდღიურად საქართველოში. ამ დროისათვის ჩვენს ქვეყანაში კორონავირუსის 42 579 შემთხვევაა დადასტურებული.

შემთხვევათა ზრდა ფიქსირდება და ეს მოსალოდნელიც იყო შემოდგომის სეზონზე. პროგნოზების მიხედვით, შემთხვევათა რაოდენობა კვლავ მზარდი დარჩება, ამიტომ მაქსიმალური ყურადღებაა საჭირო პრევენციულ ღონისძიებებზე.

პრევენციული ღონისძიებებიდან ხუთ მთავარ ღონისძიებას ვასახელებთ:

  • მათ შორის უმთავრესია პირბადის მოხმარება. პირბადე უნდა ვატაროთ ყველგან ღია და დახურულ სივრცეებში, სადაც დისტანციის დაცვა შეუძლებელია. თუ ორ ადამიანს პირბადე უკეთია, ერთმანეთს ესაუბრებიან და ერთ-ერთი ინფიცირებულია, გადადების მაჩვენებელი მინიმუმამდე მცირდება.
    პირბადის გამოყენება უნდა გახდეს ჩვენი ცხოვრების წესი მომავალი თვეების განმავლობაში.
  • მეორე პრევენციული ღონისძიებაა დისტანცირება. ყველგან – შინ თუ გარეთ ერთმანეთთან დისტანცია დავიცვათ. საუკეთესოა 1.5 ან 2 მეტრიანი დისტანცია.
  • მესამე მთავარი რეკომენდაცია ხელების ხშირი დაბანა და ზოგადი სანიტარული წესების დაცვაა. კორონავირუსი წვეთოვანი გზით ვრცელდება. წვეთი შეიძლება დაილექოს რომელიმე მყარ ზედაპირზე და ხელის საშუალებით ის სასუნთქ გზებში მოხვდეს. ამიტომ ჰიგიენის დაცვა აუცილებელია.
  • შემდეგი ღონისძიებაა შეკრებების შეზღუდვა. შეკრება შესაძლოა იყოს ძალიან მცირე, მაქსიმუმ 6-10 ადამიანით. ის უნდა გაიმართოს ღია სივრცეში და არა სახლში; ან თუ შეკრება დახურულ სივრცეში მიმდინარეობს, სივრცე ხშირად უნდა განიავდეს.
  • მეხუთე და ერთ-ერთი მთავარი რეკომენდაცია – თავის არიდება ყოველგვარი დიდი თავშეყრებისა, – იქნება ეს სადღესასწაულო, სარიტუალო თუ სხვა ტიპის შეკრება. ეპიდაფეთქების მთავარი წყარო თავშეყრაა.

კორონავირუსული ინფექცია უკან არ იხევს. ჯერჯერობით, არც ვაქცინაა და არც პირდაპირი მოქმედების წამალი არსებობს. ერთადერთ იარაღად ეს ხუთი პრევენციული ღონისძიება რჩება. დაახლოებით ერთი წელიწადი კიდევ დაგვჭირდება ამ რეკომენდაციების დაცვა, სანამ შეიქმნება ვაქცინა ან წამალი, რომელიც ფართო ხმარებაში გამოვა, სანამ ეს ვირუსი უფრო შესუსტდება. ამიტომ  უმორჩილესად გთხოვთ, რომ ეს პრევენციული ღონისძიებები ყველამ დავიცვათ“, – ამბობს ამირან გამყრელიძე.