ხარაგაულის ცენტრალური ქუჩის რეაბილიტაცია კანალიზაციის სისტემის მოწყობის შემდეგ დაიწყება.

ეს ინფორმაცია პარლამენტარმა კობა ლურსმანაშვილმა მოგვაწოდა.

ხარაგაულში საკანალიზაციო სისტემის პროექტირება-მშენებლობისთვის ტენდერი გაერთიანებული წყალმომარაგების კომპანიამ დღეს, 23 ოქტომბერს, გამოაცხადა.

ამ ტენდერში გამარჯვებულმა ორგანიზაციამ ხარაგაულში საკანალიზაციო სისტემა ხელშეკრულების გაფორმებიდან 8 თვეში უნდა მოაწყოს.

საავტომობილო გზების დეპარტამენტის მედიასთან და საზოგადოებასთან ურთიერთობის სამსახურის უფროსის თამარ ჯაფარიძესგან მოპოვებული ინფორმაციით, „ძირულა-ხარაგაული-მოლითის საავტომობილო გზის მშენებელი კომპანია „ბლექსი გრუპი“ დაბა ხარაგაულის მონაკვეთზე გზის რეაბილიტაციას კანალიზაციის სისტემის მოწყობამდე აყოვნებს. გზის დანარჩენ პერიმეტრზე სამუშაოები გეგმა-გრაფიკის მიხედვით მიმდინარეობს“.

ძირულა-ხარაგაული-მოლითის გზის მშენებლობა 2021 წელს უნდა დასრულდეს.