დღეს, 9 ოქტომბერს, ბაზალეთის თემის ოთხ და ბორითის თემის ცხრა სოფელში ფაროსანას წინააღმდეგ თერმული ნისლის გაშვება იგეგმება.

შეწამვლითი სამუშაოები საღამოს 20:00 საათზე დაიწყება.

სურსათის ეროვნული სააგენტოს იმერეთის რეგიონული სამმართველოს უფროსი ინსპექტორის, ნინო სახვაძის ინფორმაციით, ქარის შემთხვევაში თერმული ნისლის გაშვება გადაიდება.

ნინო სახვაძე ამბობს, რომ თერმული ნისლი იმ ჯგუფის პრეპარატია, რომელიც სასოფლო-სამეურნეო მცენარეების შეწამვლისას გამოიყენება და ადამიანებისთვის საფრთხეს არ წარმოადგენს.

თუმცა, უსაფრთხოების ნორმების დაცვა აუცილებელია. თერმული ნისლის გაშვების მომენტში უმჯობესია მოსახლეობამ დახუროს კარ-ფანჯარა, ხოლო  20-30 წუთის შემდეგ ადამიანებს ჩვეულებრივ შეუძლიათ საქმიანობის გაგრძელება.

ნინო სახვაძის განმარტებით, შეწამვლა ფუტკრისთვის საფრთხის შემცველი არ იქნება.

თუ როდის და სად ჩატარდება ფაროსანას წინააღმდეგ სამომავლოდ თერმული ნისლის გაშვება, დაინტერესებულ პირებს ინფორმაციის მიღება farosana.ge-ზე 24 საათით ადრე შეუძლიათ.