დღეს, 5 ოქტომბერს, ხარაგაულში ფაროსანას წინააღმდეგ თერმული ნისლის გაშვება დაგეგმილია სოფელ ბორითში.

შეწამვლითი სამუშაოები საღამოს 09:00 სთ-დან 10:00 სთ-მდე პერიოდში დაიწყება.

სურსათის ეროვნული სააგენტოს იმერეთის რეგიონული სამმართველოს უფროსი ინსპექტორის, ნინო სახვაძის ინფორმაციით, თერმული ნისლი იმ ჯგუფის პრეპარატია, რომელიც სასოფლო-სამეურნეო მცენარეების შეწამვლისას გამოიყენება და ადამიანებისთვის საფრთხეს არ წარმოადგენს.

თუმცა, უსაფრთხოების ნორმების დაცვა აუცილებელია. თერმული ნისლის გაშვების მომენტში უმჯობესია მოსახლეობამ დახუროს კარ-ფანჯარა, ხოლო  20-30 წუთის შემდეგ ადამიანებს ჩვეულებრივ შეუძლიათ საქმიანობის გაგრძელება.

ნინო სახვაძის განმარტებით, შეწამვლა ფუტკრისთვის საფრთხის შემცველი არ იქნება.

თუ როდის და სად ჩატარდება ფაროსანას წინააღმდეგ სამომავლოდ თერმული ნისლის გაშვება, დაინტერესებულ პირებს ინფორმაციის მიღება farosana.ge-ზე 24 საათით ადრე შეუძლიათ.