საავტომობილო გზების დეპარტამენტისგან გავრცელებული ინფორმაციით, მიუხედავად იმისა, რომ გლობალური პანდემიის პირობებში საქართველოში ინფრასტრუქტურულ პროექტებზე სამუშაოები არ შეჩერებულა, ზოგიერთი მათგანის ტემპი, სპეციალური კვალიფიკაციის მუშახელის უკმარისობის გამო, მნიშვნელოვნად შეფერხდა.

ამიტომ რიკოთისა და ქვეშეთი-კობის მაგისტრალების მშენებლობის პროექტებში საჭირო გახდა დამატებით 270-მდე კვალიფიცირებული პერსონალის ჩინეთიდან ჩამოყვანა.

– რიკოთის ავტობანის მშენებლობაზე ჩინეთიდან ჩამოსულმა 140-მა სპეციალისტმა, სამუშაოებში ჩართვამდე, 14-დღიანი სავალდებულო კარანტინი უკვე გაიარა. შემდეგ მათ ტესტირება ჩაუტარდათ და 4 სექტემბრიდან მუშაობას შეუდგნენ. ყველა მათგანი ჯანმრთელადაა“, – ამბობს მშენებელი კომპანიის ექიმი ალექსანდრე ბარბაქაძე.