» საქართველოში კორონავირუსით მე-19 პაციენტი გარდაიცვალა| ჩემი იმერეთი
მთავარი ახალი ამბები საზოგადოება პოლიტიკა რეკლამა
სინათლე არ უნდა ჩაქრეს

საქართველოში კორონავირუსით მე-19 პაციენტი გარდაიცვალა

საზოგადოება|25.08.2020 | ნახვა: 465

ბოლო თორმეტი საათის განმავლობაში საქართველოში კორონავირუსით მეორე პაციენტი გარდაიცვალა.

ინფექციური საავადმყოფოს სამედიცინო დირექტორის, მარინა ეზუგბაიას განცხადებით, მე-19 გარდაცვლილი პაციენტი სახლში მკურნალობდა.

„მე-19 გარდაცვლილი პაციენტი ლენჯერის კლასტერს განეკუთვნება. იგი სახლში მკურნალობდა დასთან ერთად, რომელიც ასევე კორონავირუსით იყო დაინფიცირებული, – ამბობს მარინა ეზუგბაია, – უშუალოდ მე მქონდა კომუნიკაცია პაციენტის დასთან. დღის განმავლობაში რამდენჯერმე ვესაუბრებოდი მას.

დაავადება ორივესთან მიმდინარეობდა მსუბუქად, თითქმის უსიმპტომოდ. გარდაცვლილ პაციენტს აღენიშნებოდა მენჯ-ბარძაყის მოტეხილობა, იყო ჭარბწონიანი. ასეთ მოტეხილობებს ახასიათებს ცხიმოვანი ემბოლიის განვითარება და პაციენტიც სწორედ ამ მიზეზის გამო გარდაიცვალა“.

გარდაცვალების მე-18 შემთხვევა 24 აგვისტოს საღამოს დაფიქსირდა. 87 წლის ქალბატონი ქვემო ქართლის მკვიდრი იყო. 29 ივლისიდან მკურნალობდა მცხეთის კლინიკაში, სადაც კორონავირუსის დიაგნოზით რუსთავის ცხელების ცენტრიდან გადაიყვანეს.

მარინა ეზუგბაიას ინფორმაციით, დღეს საქართველოში  კორონავირუსის 8 ახალი შემთხვევა დაფიქსირდა. გამოჯანმრთელებულთა რიცხვი კი 13-ით გაიზარდა.

8 ახალი დადასტურებული შემთხვევიდან ერთი პაციენტის დაავადების წყაროა ლენჯერი. ცნობილია ორი დაავადებულის წყაროც. ერთი დაინფიცირებული პაციენტი არის სამედიცინო პერსონალი. ოთხი პაციენტი სხვა ქვეყნებიდან შემოვიდა, მათ შორის სამი – სატვირთო ავტომობილის მძღოლია.

ამ ეტაპზე კოვიდ ცენტრებში კორონავირუსით ინფიცირებული 260 პაციენტი მკურნალობს. რეანიმაციისა და ინტენსიური თერაპიის განყოფილებებში მკურნალობას 5 კრიტიკულად მძიმე და 23 მძიმე პაციენტი აგრძელებს.

დღეის მდგომარეობით, საქართველოში კორონავირუსის დაფიქსირებიდან დღემდე:

  • სულ ინფიცირებულია 1429 პირი;
  • მათ შორის გამოჯანმრთელებულია – 1150;
  • გარდაცვლილია – 19; 
  • კარანტინში 6018 მოქალაქე იმყოფება;
  • სტაციონარში მეთვალყურეობის ქვეშ – 249.