საავტომობილო გზების დეპარტამენტისგან გავრცელებული ინფორმაციით,

მიუხედავად იმისა, რომ გლობალური პანდემიის პირობებში  საქართველოში სისტემურ ინფრასტრუქტურულ პროექტებზე სამუშაოები არ შეჩერებულა, ზოგიერთი მათგანის ტემპი, სპეციალური კვალიფიკაციის მქონე მუშახელის არასაკმარისი  რაოდენობის გამო, მნიშვნელოვნად შეფერხდა.

სამუშაოს  უფრო ეფექტურად წარმართვისთვის და მეტი პროგრესის მისაღწევად  საჭირო გახდა დამატებითი კვალიფიცირებული პერსონალის ჩინეთიდან  ჩამოყვანა.

საავტომობილო გზების დეპარტამენტის თავმჯდომარე ირაკლი ქარსელაძემ ჩინური კომპანიების წარმომადგენლებთან ერთად რიკოთისა და ქვეშეთი-კობის მაგისტრალების მშენებლობის პროექტებში დამატებითი  პერსონალის ჩართვის საკითხი განიხილა.

ჩინეთიდან ჩამოსული სპეციალისტები, სამუშაოებში ჩართვამდე, 14 დღიან სავალდებულო კარანტინს გაივლიან.

ჩინური კომპანიების წარმომადგენლები საქართველოში ეტაპობრივად, 21, 23, 25 და 26 აგვისტოს  ჩამოვლენ.

საქართველოს საზღვარზე მათ PCR ტესტით შემოწმებას და საკარანტინე ზონაში გადაყვანას, ქვეყანაში მოქმედი რეგულაციების დაცვით, კომპანიები  თავად უზრუნველყოფენ.

14 დღიანი ვადის გასვლის შემდეგ, საკარანტინო სივრცის დატოვებამდე, პერსონალი განმეორებით გაივლის ტესტირებას და ექიმის დასკვნის საფუძველზე  ჩაერთვება მიმდინარე სამუშაოებში.

სულ, კარანტინის გავლა დაახლოებით 500 სპეციალისტს მოუწევს.

წყარო