დღეს ხარაგაულში ფაროსანას წინააღმდეგ თერმული ნისლის გაშვება დაგეგმილია მოლითის თემის სოფლებში: ბაბში, ბეჟათუბანში, დეისში, ნებოძირსა და ქვებში; სარგვეშის თემის სოფლებში: სარგვეშში, საბეში, მიროწმინდაში, ჭარტალსა და ხორითში; ფარცხნალის თემის სოფლებში: ფარცხნალში, ახალსოფელში, ისლარსა და ღუდუმექეთში; ხუნევის თემის სოლებში: ბჟინევში, გედსამანიაში, ვერტყვილასა და ვერტყვიჭალაში; ხევის თემის სოფლებში: ხევში, გრიგალათში, ციცქიურასა და წაქვაში.

შეწამვლითი სამუშაოები საღამოს 09:00 – 10:00 საათიდან დაიწყება.

სურსათის ეროვნული სააგენტოს იმერეთის რეგიონული სამმართველოს უფროსი ინსპექტორის, ნინო სახვაძის  განმარტებით, თერმული ნისლი იმ ჯგუფის პრეპარატია, რომელიც სასოფლო-სამეურნეო მცენარეების შეწამვლისას გამოიყენება და ადამიანებისთვის საფრთხეს არ წარმოადგენს.

თუმცა, უსაფრთხოების ნორმების დაცვა აუცილებელია. „თერმული ნისლის გაშვებიდან 20 წუთის განმავლობაში ნივთიერება ჰაერში დგას. ამ დროს უმჯობესია, მოსახლეობამ კარ-ფანჯარა დაკეტოს და სახლში იმყოფებოდნენ. თერმული ნისლის გაშვებიდან 20-30 წუთის შემდეგ ის განიავდება და ადამიანებს საქმიანობის გაგრძელება ჩვეულებრივ რიტმში შეუძლიათ“, – ამბობს ნინო სახვაძე.

მისივე განმარტებით, შეწამვლა ფუტკრისთვის საფრთხის შემცველი არ იქნება. იმ მოსახლეებთან, რომელთაც საფუტკრე მეურნეობა აქვთ, თერმული ნისლის აგრეგატს გამორთავენ.

შეწამვლითი სამუშაოებისას მოლითის თემის სოფლებში – 3, სარგვეშის თემის სოფლებში – 4, ფარცხნალის თემის სოფლებში – 2, ხევის თემის სოფლებში – 2 და ხუნევის თემის სოფლებში – 3  მანქანა იმუშავებს.

ნინო სახვაძის ინფორმაციით, შეწამვლითი სამუშაოები ოქტომბრამდე გაგრძელდება.

თუ როდის და სად ჩატარდება ფაროსანას წინააღმდეგ სამომავლოდ თერმული ნისლის გაშვება, დაინტერესებულ პირებს ინფორმაციის მიღება farosana.ge-ზე 24 საათით ადრე შეუძლიათ.

თამარ ჩხიკვაძე