ქვეყანაში შექმნილი კორონავირუსის პანდემიის გამო საბავშვო ბაგა-ბაღებში სასწავლო პროცესი ახალი რეგულაციებით განახლდება.

ჯანდაცვის სამინისტროს შრომის ინსპექციის დეპარტამენტის ხელმძღვანელის, ბექა ფერაძის თქმით, უკვე მიმდინარეობს კონსულტაციები იმ მოთხოვნების დასადგენად, რომელთა შესრულება კერძო/საჯარო სკოლებსა და ბაღებს მოუწევთ.

ახალი რეგულაციების თანახმად, საუბარია ბაღებში პრევენციული ღონისძიებების შემუშავებაზე, ასევე, იმ ფართობის განსაზღვრაზე, სადაც ბავშვები დაიშვებიან. არ არის გამორიცხული, რომ რეგულაციების შემდეგ ბაგა-ბაღებში ჯგუფში აღსაზრდელთა რაოდენობა შემცირდეს. 

„ამ ეტაპზე მიმდინარეობს მოლაპარაკებები, როგორც კერძო, ასევე საჯარო სექტორთან. უახლოეს დღეებში კი გამოქვეყნდება პროტოკოლი – როდის და რა ნორმების დაცვით გაიხსნებიან ბაღები და სკოლები“, – განაცხადა ბექა ფერაძემ. 

შეგახსენებთ, რომ საქართველოში სკოლები და ბაღები, კორონავირუსის პანდემიის გამო, 2020 წლის გაზაფხულიდან დაკეტილია.