დღეს, 29 ივლისს, ხარაგაულის მუნიციპალიტეტის სოფელ ზვარეში დოღი გაიმართა. შეჯიბრება 2 500 მეტრ მანძილზე, მთის გზაზე ჩატარდა.

პირველი ადგილი ჩრდილელმა მერაბ თიკანაშვილმა მოიპოვა. ის თანასოფლელ გიორგი შაქარაშვილის ცხენით „ნიშა“ ასპარეზობდა.

მეორე ადგილზე ზვარელი გოგა ორთოიძე გავიდა. გოგა ჩრდილელი გიორგი დალალიშვილის ცხენით „ელვა“ ასპარეზობდა.

ფინიშთან მესამე ვახანელი ლაშა ღონღაძე მიიჭრა, თანასოფლელი გოგა ფერაძის ცხენით „ნიშა“.

პირველი ადგილის მფლობელი 200 ლარით დაჯილდოვდა, მეორე ადგილის მფლობელი – 150 ლარით, ხოლო მესამე ადგილზე გასული მხედარი – 100 ლარით.

საპრიზო ფონდი, 450 ლარი, კურორტ ნუნისის დირექციამ გამოყო. გამარჯვებულებს პრიზები „სამთა ნუნისის“ დირექტორმა ნინო პავლიაშვილმა გადასცა.