დღეს საქართველოში კორონავირუსის 24 ახალი შემთხვევა დაფიქსირდა და დაავადებულთა რიცხვმა 1073-ს მიაღწია. გამოჯანმრთელდა მხოლოდ 4  ადამიანი.

ინფექციური საავადმყოფოს კლინიკური დირექტორის, მარინა ეზუგბაიას, თქმით, 24 ახალი შემთხვევიდან 7 შემთხვევა საქართველოში საზღვრებს გარედან შემოსულ პირებს დაუდგინდათ. მათგან 5 სატვირთო ავტომანქანის მძღოლია. 24 ახალი შემთხვევიდან 5 პაციენტი დაავადებულებთან კონტაქტში იმყოფებოდა, 10 – გარდაბნის კვლევისას გამოვლენილი შემთხვევაა. ეზუგბაიას განმარტებით, კორონავირუსით ორი დაავადებულის წყარო უცნობია.

„ჩვენი პიკური პერიოდები ყოველთვის დიდ კლასტერებთან იყო დაკავშირებული. ახლაც ასეთი სიტუაციაა. გარდაბნის მუნიციპალიტეტის ე.წ. კლასტერი გამოიკვეთა – 4 სოფელი, 7 ათასზე მეტი მცხოვრებით. ამ სოფლების მოსახლეობის რაოდენობიდან გამომდინარე, შემთხვევების ასეთი მატება მოსალოდნელი იყო“, – განაცხადა ეზუგბაიამ.

მისი თქმით, გარდაბნის მუნიციპალიტეტში ეპიდემიოლოგიური კვლევა გაგრძელდება და თუ მოსახლეობა რეგულაციებს ზედმიწევნით შეასრულებს, სიტუაცია კიდევ უფრო მეტად არ დამძიმდება. 

stopcov.ge-ის განახლებული მონაცემები ასე გამოყურება:

  • კორონავირუსის დადასტურებული შემთხვევა – 1073;
  • მათ შორის გამოჯანმრთელებული – 907;
  • მათ შორის გარდაცვლილი – 16;
  • კარანტინის რეჟიმში – 5724;
  • სტაციონარში მეთვალყურეობის ქვეშ – 247;
  • უცხოეთიდან სამკურნალოდ გადმოყვანილი საქართველოს მოქალაქეები – 41.