ერთიანი ეროვნული გამოცდები გრძელდება. დღეს აბიტურიენტები გამოცდას ბიოლოგიაში აბარებენ. 14 და 15 ივლისს კი საგამოცდო ცენტრები მათემატიკის გამოცდას დაეთმო.

ამ საგანში მინიმალური ზღვარი მაქსიმალური ქულის 20% იქნება, 25%-ის ნაცვლად.

აბიტურიენტი ანა კალანდაძე, ხარაგაულის #3 საჯარო სკოლის კურსდამთავრებული, ამბობს, რომ წინა წლებთან შედარებით, მათემატიკის ტესტი გაადვილებული იყო. თუმცა ზოგიერთი საკითხი რთულად დასაძლევი აღმოჩნდა. „ყველაზე მეტად გეომეტრიული საკითხები გამიჭირდა. პანდემიის გამო ეს მასალა საფუძვლიანად ვერ გავიარე“, – ამბობს ანა.

ვარძიის სკოლის კურსდამთავრებულ მურად ოკრიბელაშვილს ეკონომიკის შესწავლა სურს და ამიტომ მათემატიკის გამოცდას აბარებს.

„მინიმალური გამსვლელი ქულა რომ არ ვიცოდით, ფსიქოლოგიურად ხელისშემშლელი აღმოჩნდა. უფრო მობილიზებული ხარ, როდესაც იცი, ბარიერი რამდენი ქულაა. რაც შეეხება ტესტს, საკმაოდ რთული იყო. დრო ზუსტად მეყო, გამოცდიდან 10 წუთით ადრე გამოვედი“, – ამბობს ის.

„ლოგარითმები, ტრიგონომეტრიული ფუქცია, სივრცითი ფიგურები, გეომეტრიული პროგრესია, წესიერი სამკუთხედი, – აი, ეს საკითხები შემხვდა. საკუთარი თავით კმაყოფილი არ ვარ, რადგან დრო არ მეყო და ჩემი ცოდნის მაქსიმუმი ვერ გამოვავლინე. საკითხებს რაც შეეხება, სირთულით წინა წლების ამოცანების დონისაა. თუმცა, წელს უფრო მეტად მსჯელობა იყო საჭირო და არა მხოლოდ – კონკრეტული თემის ცოდნა. რაც შეეხება რეკომენდაციებს, დილით მქონდა გამოცდა და პირბადის გარეშე მომიწია გამოცდის ჩაბარება“, – ამბობს მოლითის სკოლის კურსდამთავრებული მარიამ ტალახაძე.

საგამოცდო პროცესი ერთიანი ეროვნული გამოცდებით 6 ივლისს  დაიწყო და 25 ივლისს დასრულდება;

საგრანტო კონკური 25 ივლისს გაიმართება; სამაგისტრო გამოცდები 1-ლი აგვისტოდან 4 აგვისტოს ჩათვლით ჩატარდება. მასწავლებლობის მსურველებისათვის საგამოცდო პროცესი კი  22 ივლისს დაიწყება და 30 ივლისს დასრულდება.
საქართველოს მასშტაბით გახსნილია 24 საგამოცდო ცენტრი ბათუმში, ფოთში, ზუგდიდში, ოზურგეთში, ქუთაისში, ახალციხეში, გორში, თბილისში, რუსთავში, თელავსა და ხულოში.
გამოცდებისათვის რეგისტრირებულთა რაოდენობა ასეთია:
აბიტურიენტები – 39 300-ზე მეტი;
სტუდენტები – 3 600-ზე მეტი;
მაგისტრობის კანდიდატები – 12 600-ზე მეტი;
მასწავლებლობის მსურველები – 12 000-მდე.
აბიტურიენტებს საგანმანათლებლო პროგრამების შეცვლისა და დამატების შესაძლებლობა აპელაციების შედეგების გამოქვეყნებიდან მომდევნო დღის ჩათვლით ექნებათ.

ლიკა ხიჯაკაძე