ს/ს „ავტოტრანსის“ დირექტორის, დავით ხარაძისგან მოპოვებული ინფორმაციით, ამ მომენტისთვის მგზავრობის გაძვირების რეალური საფუძველი არ არსებობს.

თუმცა, დავით ხარაძე ამბობს, რომ თბილისის დიდუბის ავტოსადგურიდან დაუკავშირდნენ და ხარაგაული-თბილისის მიმართულებით მგზავრობის ტარიფის, სავარაუდოდ, 2 ლარით გაძვირებაზე ესაუბრენ.

ხარაგაული-თბილისის, ლეღვანი-თბილისისა და კიცხი-თბილისის მიკროვატობუსების მძღოლები მამუკა მაღლაფერიძე, ჯონი არევაძე და გივი ღონღაძე ამბობენ, რომ მგზავრობის ღირებულების შესახებ ინფორმაცია ორშაბათს, თბილისში ჩასვლის შემდეგ ეცოდინებათ.

ისინი მზად არიან, საქალაქთაშორისო ტრანსპორტით მგზავრთა გადაადგილებისთვის დაწესებული რეგულაციები დაიცვან.

კერძოდ,
სავალდებულოა მიკროავტობუსებს ავტოსადგურიდან გასვლამდე

  • ჩაუტარდეს დეზინფექცია;
  • მძღოლსა და ყველა მგზავრს ეკეთოს პირბადე და ხელთათმანი;
  • ღია იყოს ფანჯრები.

ტრანსპორტში აკრძალულია

  • კონდიციონერის ჩართვა;
  • მგზავრის ფეხზე დგომა.

კიცხი-თბილისის მიკროავტობუსის მძღოლი ადასტურებს, რომ მგზავრობის გაძვირებაზე თბილისის ავტოსადგურიდან მასაც ესაუბრენ.

ამ დროისთვის ხარაგაულიდან და ხარაგაულის სოფლებიდან თბილისამდე მგზავრობა 10 ლარი ღირს, ხარაგაულიდან ქუთაისამდე – 4 ლარი, ზესტაფონამდე – 2 ლარი, ხოლო ტყიბულამდე – 5 ლარი.

საქალაქთაშორისო ტრანსპორტის გადაადგილება, რაც კორონავირუსის პანდემიის გამო 18 მარტიდან აიკრძალა, 8 ივნისიდან აღდგება.

ნინო კაპანაძე