დაბა ხარაგაულის წყალმომარაგების სისტემის რეაბილიტაცია-მშენებლობისთვის გამოცხადებულ ტენდერში წინადადებების მიღება დღეს დასრულდა. მიმდინარეობს შერჩევა-შეფასების პროცესი.

გაერთიანებული წყალმომარაგების კომპანიამ ელექტრონული ტენდერი აუქციონის გარეშე (NAT) 3 608 814 ლარზე გამოაცხადა.

ამ ეტაპზე სახელმწიფო შესყიდვების სააგენტოს ვებგვერდზე ტენდერში დაფიქსირებული მონაწილე – შპს პროხოდკას ფილიალი – დაბა ხარაგაულის წყლის სისტემების რეაბილიტაციას 3 284 020 ლარად აპირებს.

სატენდერო დოკუმენტაციის თანახმად, ხარაგაულში 24-საათიანი წყალმომარაგების აღდგენა ტენდერში გამარჯვებულ კომპანიასთან ხელშეკრულების გაფორმებიდან შვიდ თვეში იგეგმება.

განსაზღვრულია ლეღვანის წყალსადენის სისტემის სრული რეაბილიტაცია, დიდვაკისა და საღანძილის ჩათვლით, და პატარა ხარაგაულში ალტერნატიული სისტემის მოწყობა.

ნინო კაპანაძე