სამედიცინო და ფარმაცევტული საქმიანობის რეგულირების სააგენტოს დირექტორმა ზაალ კააპანაძემ გეგმიური სტომატოლოგიური მომსახურების აღდგენასთან დაკავშირებით განცხადება გააკეთა.

მისი თქმით, სტომატოლოგიურ კლინიკებს რეგულირების სააგენტოს შრომის პირობების ინსპექტირების წარმომადგენლებთან ერთად შეამოწმებენ, რის შემდეგაც მათ მიეცემათ საშუალება, მოქალაქეებს გეგმიური სტომატოლოგიური სამედიცინო მომსახურეობა გაუწიონ.

„მთავრობის მიერ დაანონსებული შეზღუდვების მოხსნის ფარგლებში სტომატოლოგიურ ასოციაციებთან და სტომატოლოგიურ პროფკავშირებთან შეთანხმებით და მათი უშუალო ჩართულობით ქვეყანაში შექმნილი ეპიდსიტუაციის გათვალისწინებით შემუშავდა გარკვეული მოთხოვნები გეგმიური სტომატოლოგიური მომსახურების აღდგენის პროცესთან დაკავშირებით.

დღის ბოლომდე სამედიცინო და ფარმაცევტული რეგულირების სააგენტოს ოფიციალურ ვებ-გვერდზე გამოქვეყნდება სპეციალური განაცხადის ფორმა და მოთხოვნები, რომლებსაც უნდა აკმაყოფილებდნენ სტომატოლოგიური დაწესებულებები. სტომატოლოგიურმა კლინიკებმა უნდა შეავსონ განაცხადი და გადმოაგზავნონ ელექტრონულ ფოსტაზე.

ორშაბათიდან, 11 მაისიდან ფარმაცევტული საქმიანობის რეგულირების სააგენტო შრომის პირობების ინსპექტირების წარმომადგენლებთან ერთად შემოსული განაცხადების საფუძველზე დაიწყებს სტომატოლოგიური კლინიკების მონიტორინგს. შესაბამისი მოთხოვნების დაკმაყოფილების შემთხვევაში კლინიკებს მიეცემათ გეგმიური სტომატოლოგიური სამედიცინო მომსახურეობის შესაძლებლობა“, – აღნიშნავს ის.

შეგახსნენეთ, რომ ქვეყანაში შექმნილი ეპიდსიტუაციის გათვალისწინებით გეგმიური სტომატოლოგიური სამედიცინო მომსახურეობა შეჩერებული იყო.